Jazǵy demalys: Jandarbek Bekshın ata-analarǵa keńes berdi
NUR-SULTAN. QazAqparat - Oqý jyly aıaqtalyp, balalar demalysqa - saýyqtyrý ortalyqtaryna bara bastaıdy. Osy rette QR DSM Qoǵamdyq densaýlyq saqtaý komıtetiniń tóraǵasy - Bas memlekettik sanıtarııalyq dáriger Jandarbek Bekshın balalarǵa qatysty birneshe paıdaly keńes aıtty, dep habarlaıdy QazAqparat tilshisi.
«Vaktsınatsııany ótkizý úshin negizinen jyl saıyn elimizde qyzylshaǵa shaldyǵýdyń 1800 jaǵdaıy tirkelý kerek (Dúnıejúzilik densaýlyq saqtaý uıymynyń keńesi boıynsha - avt.). Sondyqtan, ekpe jumystaryn júrgizbeıbiz. Biraq, DDSU nusqaýy boıynsha biz vaktsınatsııany eń qaýipti toptar boıynsha júrgizemiz. Vaktsınatsııamen úsh top qamtylady. Onyń biri - 1 jasqa tolmaǵan balalar. Qazirgi ýaqytta 9 aılyq balalarǵa ekpe júrgizýdemiz. Sol sekildi medıtsına qyzmetkerlerine de ekpe jasalady. Olar erteń aýyrsa, aýrýhanalarda bul aýrý órshýi múmkin. Sondyqtan, medıtsına qyzmetkerleriniń 97 paıyzyn vaktsınatsııadan ótkizdik. Úshinshi top - osy aýrýǵa shaldyqqan adamdarmen baılanysta bolǵan adamdar. Qazirge deıin qyzylshaǵa shaldyqqan adamdarmen baılanysty bolǵan 15 myń adamǵa ekpe jasadyq», - dedi Jandarbek Bekshın OKQ-da ótken baspasóz máslıhatynda.
Bas sanıtardyń aıtýynsha, osy jumystardyń arqasynda qyzylsha aýrýy sáýirden beri mamyr aıynda 18 paıyzǵa azaıǵan.
«Balalar kanıkýlǵa shyǵady. Qaıtyp kelgennen keıin 2 mln-nan astam vantsınatsııa júrgizemiz. Ol qyzylsha men jelsheshek aýrýynyń aldyn alý úshin júrgiziledi», - deıdi ol.
Jandarbek Bekshın sondaı-aq, balalar demalysqa shyǵyp jatqan ýaqytta juqpaly aýrýlardan saqtaný kerektigin atap ótti.
«Qazir balalar demalysqa shyǵyp barady. Olardyń óz-ózimen júrmegeni abzal. Kózden tasa bolmaı, kez kelgen jerden sý ishe bermeýi tıis. Kókónis, jemis-jıdekti jýylǵannan keıin jeýi kerek. Qoldy jıi jýǵan abzal. Ata-analar bul máselelerdi naqty baqylaýǵa alýy tıis. Balalarymyz syrttaǵy saýyqtyrý uıymdaryna ketedi. Byltyr ondaı saýyqtyrý ortalyqtarynyń 219-y balalardy qabyldaǵan bolatyn. Qazirgi tańda saýyqtyrý ortalyqtarynyń 48-ne sanıtarııalyq-epıdemıologııalyq qorytyndy berdik. Ákimdermen birlesip, bul jumys atqarylýda. Ata-analar jańadan qurylǵan bizdiń komıtettiń (taýarlar men qyzmetterdiń sapasy men qaýipsizdigin qadaǵalaý komıteti) saıtyna kirip, sanıtarııalyq erejelerge saı keletin saýyqtyrý ortalyqtaryn kóre alady. Ol jerde kúndelikti jarıalap turamyz. Saýyqtyrý uıymy sol tizimde bolsa, balalardy sol uıymǵa qoryqpaı apara berýge bolady», - deıdi Jandarbek Bekshın.
