Jazǵy demalys – Ulytaý oblysynda qala syrtyndaǵy lager joq

ASTANA. QazAqparat – Qazaqstanda mektep oqýshylarynyń 85,3% jazǵy demalyspen jáne saýyqtyrýmen qamtylady, dep habarlaıdy QazAqparat tilshisi.

Bul týraly QR Oqý-aǵartý mınıstri Ǵanı Beısembaev Úkimet otyrysynda aıtty.

«Jazǵy ýaqyttaǵy mańyzdy jumystardyń biri – balalardyń demalysy men saýyqtyrýyn uıymdastyrý. Jazǵy demalys jáne saýyqtyrýmen 1-10 synyptar aralyǵyndaǵy balardyń 85,3% qamtylady, bul – 2,8 mln balany quraıdy. Onyń ishinde 500 myń jekelegen sanattaǵy otbasy balalary bar», - dedi Oqý-aǵartý mınıstri.

Onyń aıtýynsha, qazir lagerlerde balalardy qabyldaýǵa daıyndyq jumystary qyzý júrgizilip, aıaqtalýǵa jaqyn.

Kanıkýldy asyǵa kútken balalarǵa qala syrtyndaǵy 218 jáne 10,2 myń mektep janyndaǵy, profıldik jáne shatyrly lagerler esigin aıqara ashady.

Eń kóp lagerler sany Batys Qazaqstan, Almaty, Túrkistan jáne Shyǵys Qazaqstan oblystarynda baıqalady.

Qala syrtyndaǵy lager Ulytaý oblysynda múldem joq, al Astanada ekeý, Mańǵystaý oblysynda – 3, Shymkent qalasynda – 3 lager ǵana bar.

«Budan bólek, oqýshylarǵa dástúrler men mádenı qundylyqtarmen tanysýǵa múmkindik beretin «Etnoaýyl», «Jazdyq joldama» jobalaryn iske asyrý, jetekshi ýnıversıtetter janyndaǵy jazǵy jáne olımpıadalyq rezerv mektepteriniń jumysy kózdelgen», - dedi Ǵanı Beısembaev.

Aıta keteıik, Qazaqstanda 172 myń túlek mektep bitiredi, onyń ishinde 6,8 myń oqýshy «Altyn belgige» úmitker.

Buǵan deıin Ǵanı Beısembaev oqý jylynyń nelikten uzartylǵanyn túsindirgen edi.