Jazǵy demalys: Elordalyq oqýshylarǵa qandaı jobalar ázirlendi
NUR-SULTAN. QazAqparat – Nur-Sultan qalasy Bilim basqarmasy basshysynyń orynbasary Rımma Imanǵazınova elordalyq oqýshylarǵa jazǵy demalysyn uıymdastyrý sharalaryn aıtyp berdi, dep habarlaıdy QazAqparat tilshisi.
«Bıyl balalar úshin jazǵy demalys QR Bilim jáne ńylym mınıstrligi usynǵan «Qazaqstan balalary – jazdy qýanyshqa toltyraıyq» taqyrybymen uıymdastyrylady. Balalarymyz úshin jazǵy demalys naýqany barlyq sanıtarlyq talaptardy saqtaı otyryp, 1-30 maýsym aralyǵynda Oqýshylar saraılary janynda jazǵy demalys akademııasynda, kórkem jáne mýyzkalyq mektepterde, tehnıkalyq jáne shyǵarmashylyq ortalyqtarda, «Art tumar» ortalyǵynda úıirmeler men sektsııalardyń ashylýymen bastalady», - dedi R. Imanǵazınova elorda ákimdiginde ótken onlaın brıfıngte.
7 maýsymnan 10 tamyzǵa deıin árqaısysy 10 kúnnen 5 maýsymdyq qala syrtyndaǵy eki lager ashylady. Bul – 200 oryndyq «Arman» týrıstik saýyqtyrý kesheni jáne 160 oryndyq «Borovıchok» saýyqtyrý lageri. Óńir qyzyl aımaqta bolǵan kezde lager tolymdyǵy 30 paıyzǵa deıin, sary aımaqta – 50 paıyzǵa deıin shekteledi, al jasyl aımaqta esh shekteý bolmaıdy.
«Balalar lagerleri jumysyna kolledjderdiń bilim alýshylarynan quralǵan pedagogılkalyq jasaqtar belsendi tartylady. Árbir mektep jappaı oqytý qory aıasynda QR Úkimetiniń №64 Qaýlysyna sáıkes, lagerlerge tegin baratyn balalardyń jeńildikti sanattaryn anyqtaıdy», - dep túsindirdi basqarma ókili.
Budan basqa, 1 maýsym men 25 tamyz aralyǵynda balalarǵa bilim berý uıymdary bazasynda onlaın alańdar qoljetimdi bolady. Naqty qurylǵan jumys balalarǵa tańerteńnen bastap, qyzyqty jáne paıdaly bilim alýǵa múmkindik beredi. Munda balalar ózderin IT-baǵyttardyń ár túrli rólderinde synap kóre alady. Baǵdarlamalaý, dızaın, júıelik basqarý, oıyndar ázirleý jáne basqa da baǵyttar bolady.
«Osy jazdyń ereksheligi – balalardyń qaýipsizdigin qamtamasyz etýge qoıylatyn qatań talaptar. Osyǵan baılanysty, bizdiń barlyq mekemelerimiz qosymsha uıymdar men qala syrtyndaǵy lagerler bazasyndaǵy jumysty uıymdastyrý boıynsha barlyq sanıtarlyq normalardy saqtaý úshin qajetti materıaldarmen jáne jabdyqtarmen jasaqtalǵan», - deıdi Rımma Imanǵazınova.
