Jazǵy balalar demalys ortalyqtarynyń birinshi aýysymy aıaqtaldy (FOTO)
ASTANA. QazAqparat - Jazǵy demalys bastalǵan kezden elordalyq oqýshylar óz ýaqyttaryn tıimdi ótkizýde. Budan buryn habarlanǵandaı, Astana qalasynda mektep janyndaǵy balalar lagerleri jumys isteıdi, dep habarlady Astana qalasynyń resmı portaly.
Keshe M. Ótemisuly atyndaǵy oqýshylar saraıynyń balalar demalys ortalyǵynda «Jazǵy shyǵarmashylyq mektebiniń» birinshi aýysymy aıaqtaldy. Jazǵy lagerler baǵdarlamasyna oqýshylardy tamaqtandyrý, júzý ádisterin úıretý jáne muzda syrǵanaý, lıngvıstıka, shahmat oınaý sekildi paıdaly sabaqtar engizilgen. Bir aýysymnyń (12 kún) quny 15 000 teńgeni quraıdy.
Oqýshylar saraıynyń dırektory Quralaı Muqyshevanyń aıtýynsha, birinshi aýysymda atalmysh lagerge 80 oqýshy qatysqan. Olardyń deni 1-4 synyp oqýshylary. Alaıda ekinshi aýysymda balalar sany budan eki ese artady dep kútilýde.
Oqýshylar arasynda salaýatty ómir saltyn nasıhattap, olarǵa bos ýaqytty tıimdi ótkizýdi úıretý maqsatynda «Jazǵy shyǵarmashylyq mektepteri» uıymdastyrylady. Búgin birinshi aýysymnyń jumysy máresine jetti. Biz 1 maýsym - Halyqaralyq balalardy qorǵaý kúni ashyldyq. Bir aýysym 12 kúnge jalǵasady. Oqýshylar saǵat 09:00-16:00 aralyǵynda óz ýaqyttaryn lagerde qyzyqty ótkizedi», - dedi M. Ótemisuly atyndaǵy oqýshylar saraıynyń dırektory Quralaı Muqysheva.
Jalpy, jazǵy lagerlerde úsh aýysym uıymdastyrylmaq. Sonymen qatar, mektep oqýshylary mektep aýlasyn kógaldandyrý jumystaryna da aralasady. Odan bólek, zııatkerlik, shyǵarmashylyq sabaqtar ótkiziledi.
Eske sala keteıik, Astana qalasy Bilim basqarmasynyń habarlaýynsha, 73 orta mekteptiń janynan ashylǵan lagerler 1 maýsym men 10 shilde aralyǵynda 1-4 synyptardan 45 000 oqýshyny qamtymaq.
