Jazǵy shomylý maýsymy: Shymkentte qaı jerde sýǵa túsýge bolady

ShYMKENT. KAZINFORM – Qaladaǵy barlyq sý aıdyndary shomylýǵa qaýipsiz emes jáne keı jerlerde sýǵa túsýge tyıym salynǵan. 

Bıyl Shymkentte sý mańynda jappaı demalýǵa arnalǵan bes resmı aımaq belgilendi. Alaıda shomylýǵa tek úsheýinde ǵana ruqsat etilgen:

• Koshkarata ózeniniń bastaýy;

• «Rahat-Badam» demalys aımaǵy (Badam sý qoımasy);

• «Holodılnık» demalys aımaǵy (Toǵys sý qoımasy).

Dendroparktaǵy kól men «Jaılaýkól» aımaǵy serýendeýge jáne sýdaǵy oıyn-saýyqqa arnalǵan oryndar bolyp qala beredi, biraq shomylýǵa tyıym salynǵan.

Tyıym salynǵan jerde sýǵa túsý – 27 524 teńge mólsherinde aıyppulǵa ákelýi múmkin. Ótken jyly Shymkentte ákimshilik kodekstiń 412-baby boıynsha 46 adam jaýapkershilikke tartylyp, jalpy somasy 800 myń teńgeden astam aıyppul salynǵan.

– Sýda bolatyn qaıǵyly jaǵdaılardyń aldyn alý maqsatynda qutqarýshylar profılaktıkalyq sharalardy kúsheıtýde. Shomylý maýsymy bastalǵannan keıin turǵyndarǵa 112 qyzmetinen eskertý SMS-habarlamalar jiberiledi. Sonymen qatar, tyıym salatyn jáne eskertý belgileri ornatylyp, polıtsııamen birlesken reıdter ótkiziledi. Qaýipti jerlerde qaraýsyz júrgen balalardyń ata-analaryna da shara qoldaný josparlanyp otyr, - delingen Shymkent qalasy Tótenshe jaǵdaılar departamentiniń habarlamasynda.

Tabıǵı sý kózderinen bólek, shymkenttikter 20 akvapark pen basseınniń qyzmetin paıdalana alady. Bul baǵytta qoldanystaǵy memorandýmdarǵa tolyqtyrýlar engizilip, sabaq kesteleri men balalar tizimi jasaqtalady. Júzýdi úıretý tegin júrgiziledi.

Qaýipsizdikti arttyrý maqsatynda qala aýmaǵyndaǵy shomylýǵa tyıym salynǵan oryndardyń sany 13-ten 30-ǵa deıin kóbeıtilmek.

Bıyl Shymkentte, qýanyshqa oraı, ázirge sýǵa baılanysty birde-bir qaıǵyly oqıǵa tirkelgen joq, alaıda shomylý maýsymy endi ǵana bastaldy. Al, ótken jyly qalada eki adam sýǵa batyp kóz jumǵan, onyń biri – bala bolǵan.

Aıta keteıik, budan buryn Túrkistan oblysyndaǵy sý aıdyndarynda 21 qaıǵyly oqıǵa tirkelgenin jazǵan bolatynbyz.