Jazǵy Olımpııa oıyndaryndaǵy Qazaqstan quramasynyń jetistikteri men kemshilikteri
ASTANA. KAZINFORM – 26 shilde men 11 tamyz aralyǵynda Frantsııa astanasy Parıjde XXXIII Jazǵy Olımpııa oıyndary ótti. Bul is-sharaǵa 206 elden kelgen 10,5 myńnan astam sportshy qatysty.
Osy Olımpııa oıyndaryna Qazaqstan Respýblıkasynyń atynan 80 sportshy qatysty, olar 25 sport túrinen 92 joldama jeńip aldy.
«Olardyń ishinde jeńil atletıka, júzý, veloshosse, sadaq atý, sporttyq órmeleý, grek-rım kúresi, erkin kúres, sporttyq gımnastıka, stend atý, myltyqpen atý, qazirgi bessaıys, breıkıng, boks, velotrek, ústel tennısi, semserlesý, baıdarka jáne kanoemen esý, akademııalyq esý, taekvondo, kórkem gımnastıka, tennıs, dzıýdo, trıatlon, badmınton jáne batýt gımnastıkasy bar.
Olımpıada qarsańynda brıtandyq Inside the Games jýrnaly Ortalyq Azııa elderi úshin boljamdar jasaǵan maqalasyn jarııalady. «After Tokyo dud, Central Asian countries may struggle again in Paris» atty maqalada Qazaqstannyń Parıjde altyn medal ala almaıtyny týraly boljam aıtyldy. Sebepteri retinde kelesi jaǵdaılar ataldy:
— 8-10 jyl buryn bastalǵan júıeli aqaýlar;
— Azııa oıyndaryndaǵy sátsizdikten keıin reformalarǵa daıyndalýǵa berilgen ýaqyttyń jetkiliksizdigi, ıaǵnı bar bolǵany 8-9 aı», — dep jazdy QR Týrızm jáne sport mınıstrligi.
Alaıda, qazaqstandyq sportshylar bul boljamdardy joqqa shyǵaryp, Parıjdegi Olımpııa oıyndarynda eleýli jetistikterge jetti. Qazaqstan quramasy 1 altyn, 3 kúmis jáne 3 qola medal jeńip alyp, jalpykomandalyq esepte 43-oryndy ıelendi. Tokıodaǵy Olımpııa oıyndarymen salystyrǵanda, aıtarlyqtaı alǵa jyljý bar: Tokıoda Qazaqstan 8 qola medalmen 83-oryndy ıelense, Parıjde komanda 40 orynǵa kóterildi.
«Ásirese, dzıýdo men sporttyq gımnastıkadaǵy jetistikterdi erekshe atap ótý kerek. Eldos Smetov táýelsiz Qazaqstan tarıhynda dzıýdodan alǵashqy altyn medaldi jeńip aldy. Narıman Qurbanov sporttyq gımnastıkadan tarıhı kúmis medaldiń ıegeri atansa, Aleksandra Le men Islam Sátpaev aralas pnevmatıkalyq atýda qola medal oljalady. Sporttyq órmeleýden Ámir Maımuratov irikteý kezeńinde 4,89 sekýndtyq nátıjemen Olımpıada rekordyn jańartty.
Olımpııa oıyndarynyń barlyq medal ıegerleri Qazaqstan týmalary sanalady, bul eldiń ishki áleýetin jáne legıonerlerge táýelsizdigin kórsetedi. Tájirıbeli sportshylar — Demeý Jadyraev, Ǵusman Qyrǵyzbaev jáne Nazym Qyzaıbaı joǵary sheberlik pen daıyndyq deńgeıin kórsetti», — deıdi vedomstvodan.
Degenmen, qol jetkizilgen jetistikterge qaramastan, reformalar men ózgeristerdi qajet etetin sport túrleri de bar.
«Muqııat nazar aýdarýdy qajet etetin sport túrleri — boks, tennıs, jeńil atletıka jáne velosport. Atalǵan sport túrlerindegi nátıjeler kútken deńgeıge sáıkes kelmeıdi. Bul sport túrlerinde basqarý júıesin aýystyrý, damý strategııasyn qaıta qaraý, sondaı-aq sportshylardy halyqaralyq arenada básekege qabilettilikti qamtamasyz etý úshin kúsheıtilgen daıyndyq qajet. Degenmen, osy sport túrlerindegi sátsizdikterge qaramastan, jalpy alǵanda, qurama tabysty óner kórsetti», — delingen mınıstrlik málimetinde.
