Jazǵy maýsymda týrıstik aımaqtarǵa jetý jeńildedi
ASTANA. KAZINFORM – Kólik mınıstrligi jazǵy demalys maýsymy qarsańynda elimizdiń negizgi týrıstik baǵyttarynyń kóliktik qoljetimdiligi týraly aqparat jarııalady.
Vedomstvonyń málimetinshe, týrıstik aımaqtarǵa aparatyn avtomobıl joldaryn jaqsartý, jol boıyndaǵy servısti damytý jáne azamattardyń qaýipsiz ári jaıly qatynaýyn qamtamasyz etý baǵytyndaǵy jumystar júıeli túrde júrgizilip keledi.
Býrabaı kýrorttyq aımaǵyna kirý Şýchınsk qalasy arqyly ótetin «Astana – Petropavl» avtomobıl joly arqyly júzege asady. Bul baǵyt demalys ornyna jetýdiń negizgi ári qolaıly joly sanalady.
Zerendige kelýshiler «Kókshetaý – Atbasar» jáne «Şýchınsk – Zerendi» avtomobıl joldaryn paıdalana alady. Sońǵy baǵyt Aqmola oblysyndaǵy eki iri kýrorttyq aýmaq – Býrabaı men Zerendini ózara baılanystyrady.
– Júzege asyrylyp jatqan is-sharalardyń nátıjesinde tanymal demalys aımaqtaryna baratyn negizgi marshrýttar normatıvtik jaǵdaıǵa keltirilip, avtokólik aǵynyna daıyn. Sonymen qatar týrısterge shıpajaılarǵa yńǵaıly ári túsinikti jol nusqaýlyǵy qamtamasyz etilgen, – delingen mınıstrlik habarlamasynda.
Qarqaraly kýrorttyq aımaǵyna respýblıkalyq mańyzy bar «Qaraǵandy – Qarqaraly» avtomobıl joly arqyly jetýge bolady. Byltyr jóndeýden ótken jol búginde qaýipsiz ári jaıly qozǵalysqa múmkindik berip otyr.
Baıanaýyl shıpajaıy respýblıkalyq mańyzy bar «Qalqaman – Baıanaýyl – Botaqara» avtomobıl jolynyń boıynda ornalasqan.
Balqash kóline avtokólikpen eki baǵyt arqyly jetýge bolady. Negizgi baǵyt – «Qaraǵandy – Almaty» avtojoly. Odan ári Balqash qalasynan Burylbaıtal aýylyna deıingi batys jaǵalaý joly arqyly qatynaýǵa múmkindik bar.
Alakólge baratyn týrıster úshin de eki negizgi baǵyt qarastyrylǵan. Kóldiń soltústik jaǵalaýyna «Taldyqorǵan – Óskemen» jolynan «Taskesken – Baqty» jáne «Maqanshy – Qabanbaı» baǵyttary arqyly jetýge bolady. Al ońtústik jaǵalaýyna «Úsharal – Dostyq» avtomobıl joly aparady.
Aıta keteıik, buǵan deıin Kólsaı men Qaıyńdyǵa aparatyn jol qashan jóndelip bitetini habarlandy.
