Jazǵy maýsymda qosymsha 4 Talgo poıyzy qatynaıdy
ASTANA. KAZINFORM – Ulttyq tasymaldaýshy jazǵy demalys kezeńindegi jolaýshylar suranysyn qamtamasyz etý maqsatynda tórt qosymsha Talgo poıyzyn iske qosady.
«Jolaýshylar tasymaly» AQ málimetinshe, 2026 jylǵy 18 maýsymnan bastap №254/253 «Nurly jol – Dostyq», №211/212 «Almaty-2 – Dostyq», №207/208 «Almaty-2 – Dostyq» jáne №231/232 «Almaty-2 – Semeı» baǵyttary boıynsha qosymsha poıyzdar qatynaı bastaıdy.
Qosymsha quramdar óńirlerdiń kóliktik qoljetimdiligin arttyrýǵa jáne jazǵy maýsymdaǵy jolaýshylar aǵynyn azaıtýǵa múmkindik beredi.
– Bul shara óńirlerdiń kóliktik qoljetimdiligin qamtamasyz etýge jáne jazǵy demalys kezeńinde joǵary suranysty qanaǵattandyrýǵa baǵyttalǵan, – dep habarlady ulttyq tasymaldaýshy.
№254/253 «Nurly jol – Dostyq» poıyzy 22 maýsym men 31 tamyz aralyǵynda aptasyna eki ret – dúısenbi jáne beısenbi kúnderi qatynaıdy. Quramynda 27 vagon bolady. Poıyz 344 jolaýshyǵa arnalǵan, onyń ishinde mobıldigi tómen azamattarǵa arnalǵan arnaıy kýpe qarastyrylǵan.
Al №211/212 «Almaty-2 – Dostyq» baǵyty boıynsha poıyz 20 maýsymnan 30 tamyzǵa deıin taq kúnderi qatynaıdy. Quramynda 23 vagon bar jáne 326 jolaýshy orny qarastyrylǵan.
№207/208 «Almaty-2 – Dostyq» poıyzy 19 maýsymnan 29 tamyzǵa deıin jup kúnderi júredi. Quramynda 22 vagon bar, jalpy syıymdylyǵy – 288 oryn.
Sondaı-aq №231/232 «Almaty-2 – Semeı» baǵyty boıynsha qosymsha Talgo poıyzy 18 maýsymnan 30 tamyzǵa deıin jup kúnderi qatynaıdy. Onyń quramynda 22 vagon bolady jáne 288 jolaýshyny tasymaldaýǵa arnalǵan.
– Bıletter resmı bilet.railways.kz saıtynda, «Jolaýshylar tasymaly» AQ bılet kassalarynda, sondaı-aq bıletterdi satýdyń mobıldi servısteri arqyly qoljetimdi, – delingen habarlamada.
Ulttyq tasymaldaýshynyń málimetinshe, jolaýshylar qosymsha aqparatty 1433 biryńǵaı baılanys nómiri nemese kompanııanyń resmı áleýmettik jelidegi paraqshalary arqyly ala alady.
Aıta keteıik, poıyz qozǵalysyn endi onlaın baqylaýǵa bolady.
