Jazǵy kanıkýlda oqýshylar men stýdentter jumys isteı alady

ASTANA. KAZINFORM – Úkimet basshysy Oljas Bektenov jazǵy demalysta jumys istegisi keletin oqýshylar men stýdentterdi jumyspen qamtýdy tapsyrdy.

- Birinshiden, óńir ákimdikteri jáne Oqý-aǵartý mınıstrligi Memleket basshysynyń saýyqtyrý lagerleri men balalardyń ınnovatsııalyq shyǵarmashylyǵy ortalyqtaryn salý týraly tapsyrmasyn oryndaý qarqynyn jedeldetýge tıis. Barlyq obekti belgilengen merzimde tapsyrylýy kerek.

Ekinshiden, Týrızm jáne sport mınıstrligi balalardyń tarıhı-mádenı mura obektilerine, tanymal týrıstik aımaqtarǵa barýy úshin ákimdikterdiń óńiraralyq ózara is-qımylyn úılestirsin. Batys óńirindegi balalarǵa elimizdiń shyǵys aımaqtaryn kórip-bilý qyzyqty bolmaq.

Al ońtústik oblystardaǵy oqýshylardyń soltústik aımaqtarǵa jáne kerisinshe saıahattap barýyn uıymdastyrý qajet, - dedi Oljas Bektenov Úkimet otyrysynda. 

Premer-mınıstrdiń málimdeýinshe, balalar elimizdiń kórikti jerleri men baı mádenı murasyn tanyp-bilýi tıis. 

- Mádenıet jáne aqparat mınıstrligi jazǵy demalys kezinde balalardyń mýzeılerge, teatrlarǵa, qoryqtarǵa, ulttyq parkterge tegin barýyn qamtamasyz etsin.

Úshinshiden, Eńbek jáne halyqty áleýmettik qorǵaý mınıstrligi men ákimdikter jumys isteýge nıet bildirgen oqýshylar men stýdentterdi ýaqytsha jumys oryndarymen qamtamasyz etý sharalaryn qabyldasyn. Bul rette olardyń eńbek quqyqtary saqtalýǵa tıis, - deıdi ol. 

Buǵan deıin Oljas Bektenov mektep bitirý keshinde balalardyń qaýipsizdigine erekshe nazar aýdarý qajettigin aıtty. 

Sondaı-aq Úkimet basshysy balalardy sýda jáne órt kezinde qutqarý daǵdylaryna úıretý qajettigine toqtaldy.