Jazǵy kanıkýlda balalarǵa arnalǵan qandaı sporttyq is-sharalar ótedi
ASTANA. KAZINFORM – Bıyl jazda el aýmaǵynda balalar sportyn ilgeriletý maqsatynda birqatar aýqymdy is-shara ótkiziledi. Tolyǵyraq Týrızm jáne sport vıtse-mınıstri Erjan Erkinbaev aıtyp berdi.
- Jumystyń kelesi baǵyty balalar men jasóspirimderdiń sporttyq áleýetin damytý, salaýatty ómir saltyn nasıhattaý. Jazǵy demalys kezinde balalar men jasóspirimderge arnalǵan Prezıdent testteri, «KAPSHAGAI KIDS TROPHY» respýblıkalyq fýtbol týrnıri ótedi. Sondaı-aq aýyl mektepteri arasynda «Aýyl sporty» keshendi jarystary, aýyl balalary arasynda fýtboldan «Halyk OPEN CUP» respýblıkalyq týrnıri ótedi. Balalardyń bos ýaqyty men sporttyq daıyndyǵy úshin «Qoljetimdi sport» jáne «Aýla Fıt» jobalary tabysty iske asyrylyp jatyr. Memlekettik sporttyq tapsyrys sheńberinde 7 myńnan astam sport sektsııasy jumys isteıdi. Oǵan 250 myńnan astam balalar men jasóspirimder tegin qatysady. Bul baǵdarlama jazǵy demalys kezinde júzege asyrylady, - dedi Erjan Erkinbaev Úkimet otyrysynda.
Sondaı-aq barlyq óńirde balalardy qorǵaý kúnine (1 maýsym) jáne sport kúnine (18 tamyz) arnalǵan halyq arasynda sporttyq-buqaralyq jáne saýyqtyrý is-sharalary ótedi.
- Sonymen qatar jyl saıyn jalpy bilim beretin mektepter arasynda 10 sport túri boıynsha ulttyq mektep sport lıgasy ótkiziledi. Búginde elimizde jyl boıy 521 balalar men jasóspirimder sport mektebi jumys isteıdi. Onda 406 myńnan astam bala aınalysady. Sondaı-aq jalpy sany 6,5 myńnan astam balany qamtıtyn olımpıadalyq rezervtegi 14 oblystyq jáne 5 respýblıkalyq mamandandyrylǵan mektep-ınternat-kolledji bar. Atalǵan mekemelerdiń tárbıelenýshileri úshin jazǵy ýaqytta sporttyq jáne sporttyq-saýyqtyrý lagerleri uıymdastyrylady. Erekshe bilim berý qajettilikteri bar balalarǵa aıryqsha nazar aýdarylady. Bul baǵytta múmkindigi shekteýli balalar men jasóspirimderdiń sportpen shuǵyldanýǵa, salaýatty ómir saltyn ustanýǵa, olardyń sporttaǵy talantyn damytýǵa ári yntasyn arttyrýǵa arnalǵan is-sharalar ótedi, - deıdi ol.
Onyń aıtýynsha, osy jazda erekshe balalarǵa arnalǵan sporttyń 7 túri boıynsha «Juldyzaı» ulttyq ınklıýzıvti oıyndarynyń óńirlik irikteý jarystary jalǵasady.
- Odan bólek ulttyq sport túrleri boıynsha toǵyzqumalaqtan «Jas úmit» respýblıkalyq týrnıri, jamby atýdan jasóspirimder arasyndaǵy Qazaqstan Respýblıkasynyń chempıonaty, 2012-2013 jyly týǵan balalar arasynda qazaq kúresinen Qazaqstan Respýblıkasynyń birinshiligi, jasóspirimder arasynda asyq atýdan Qazaqstan Respýblıkasynyń chempıonaty josparlanǵan. Іs-sharalardy ótkizý kezinde barlyq múddeli tarappen birlesip qatysýshylardyń qaýipsizdigin qamtamasyz etý úshin qajetti sharalar qabyldanady. Prezıdent Ákimshiliginiń tapsyrmasy aıasynda jergilikti atqarýshy organdarmen «Balalardy avtokólikpen tasymaldaý qaýipsizdigi erejelerin saqtaý» taqyrybynda keńes ótkizildi. Sport federatsııalary men óńirlik basqarma mádenıet jáne sport salasyndaǵy uıymdardyń balalardy qaýipsiz tasymaldaýy boıynsha sýretterden turatyn ádistemelik usynymdar joldady, - dep tolyqtyrdy E.Erkinbaev.
Aıta keteıik, endi balalardy sport jarystaryna polıtsııanyń súıemeldeýinsiz jiberýge tyıym salynady.