Jazǵy garderob: qandaı túster men matalar trendte

ASTANA. KAZINFORM – 2026 jylǵy jaz maýsymynda sán áleminde jeńildik, tabıǵılyq jáne aıqyn sılýetterge basymdyq berilip otyr. Bul týraly stılıst Móldir Beısenǵalı Jibek Joly arnasynyń “Búgin LIVE” efırinde aıtty.

Stılıstiń málimetinshe, bıylǵy maýsymda tús tańdaýda ashyq ári salqyn reńkterge erekshe mán bergen jón.

– Pantone Color Institute belgilegen bıylǵy jazdyń eń basty túsi aqtyń salqyn reńgi. Ekinshisi qanyq qyzyl tús. Kógildir, ashyq qyzyl, laım túster de trendte. Oǵan qosa ózimiz kúndelikti kıetin bazalyq aq, súr túster de bar. Jazǵy ýaqytta ózimiz ádette kóretin tústerdiń aqshyl reńkterin tańdaýǵa bolady. Jaz ýaqyty bolǵan soń sapaly tabıǵı matalarǵa nazar aýdaramyz. Zyǵyr, toqyma, maqta matalaryn tańdaýǵa bolady. Bıyl atlas matasynan shalbarlar, kóılekter men beldemsheler trendte, – deıdi Móldir Beısenǵalı.

Sondaı-aq mamannyń aıtýynsha, sánde shyǵys naqyshy qaıta jandanyp keledi, al kıim pishiminde aıqyn sılýetter aldyńǵy qatarǵa shyqqan.

– Bıyl shyǵys stılindegi kıimder sánde. Kestelengen kóılekter jáne tizeniń ústinen keletin beldemsheler de sánge qaıta oraldy. Buǵan deıin keń kıimderdi kóp kıetin. Ol trendten birtindep yǵysty. Qazirgi tańda dene bitimimzdi aıqyndaıtyn kıimder sánge aınalyp jatyr, – deıdi Móldir Beısenǵalı.

Maman garderob qurýda bazalyq kıimderdiń úlesi basym bolýy tıis ekenin aıtady.

– Ýnıversaldy bazalyq kıimderge aq jeıde, shalbar, beldemshe, ózińizdiń dene bitimińizge saı kóılek pen djaketter jatady. Bazalyq tústerden jazda aq tústi tańdaǵan jón. Mysaly aq kostıým shalbardy alsańyz barlyq jerge kıe beresiz. Qara, sur, qońyr túster ýnıversaldy tústerge jatady. Biraq jaz aılarynda aqshyl tústerdi tańdaǵanymyz durys. Ár áıeldiń garderobynda 70% bazalyq kıimder bolsa, 30%-yna trendtik kıimderdi alýǵa bolady. Sol kezde trendtik kıimderdi ózimizdiń bazalyq kıimdermen úılestirip júre alamyz, – deıdi stılıst.

Aıta keteıik, “Búgin LIVE” stýdııasyna Kazakhstan Fashion Week negizin qalaýshy Saıat Dosybaev qonaq boldy.