Jazǵy demalysta balalar qaýipsizdigi kúsheıtildi: TJM el boıynsha reıd júrgizip jatyr
ASTANA. KAZINFORM - Qazaqstan Tótenshe jaǵdaılar mınıstrliginiń bólimsheleri «Balalardy sýdaǵy qaýipten saqtańyz!» respýblıkalyq aktsııasy aıasynda elimizdiń barlyq óńirinde aýqymdy profılaktıkalyq jumystar júrgizip jatyr, dep habarlaıdy mınıstrliktiń baspasóz qyzmeti.
Qutqarýshylar polıtsııa qyzmetkerlerimen, jergilikti atqarýshy organdardyń ókilderimen jáne eriktilermen birlesip reıdter, patrýldeý sharalary, ashyq sabaqtar, balalar lagerlerindegi kezdesýler men ınteraktıvti oqytý is-sharalaryn uıymdastyrǵan. Aktsııanyń basty maqsaty – balalar men jasóspirimder arasynda sýda qaýipsiz minez-qulyq mádenıetin qalyptastyrý, sýdaǵy jazataıym oqıǵalardyń aldyn alý jáne jazǵy demalys kezinde kámeletke tolmaǵandardyń qaýipsizdigine eresekterdiń jaýapkershiligin arttyrý.
Almaty qalasynda TJD mamandary balalar lageriniń tárbıelenýshilerine arnalǵan «Qaýipsizdiktiń mobıldi mektebi» jobasy aıasynda aýqymdy is-shara ótkizdi. Balalar qutqarýshylardyń jumysymen tanysyp, órt sóndirý tehnıkasynyń jaýyngerlik ázirlikke keltirilýin tamashalady, oqý-jattyǵý evakýatsııasyna qatysyp, jer silkinisi sımýlıatoryn synap kórdi. Sonymen qatar olar órt, jer silkinisi jáne sýdaǵy qaýipsizdik erejelerin meńgerdi.
Astanada sý aıdyndaryndaǵy qaýipsizdikti kún saıyn 70-ten astam qyzmetker qamtamasyz etedi. Bul jumysqa 12 tehnıka men jeti júzý quraly jumyldyrylǵan. Patrýldeý barysynda demalýshylarǵa sýdaǵy qaýipsizdiktiń negizgi talaptary túsindirilip, erejeler eske salynady. Al sýdaǵy qaýipsizdik qaǵıdalaryn buzǵany úshin búgingi kúnge deıin 31 adam ákimshilik jaýapqa tartyldy.
Shymkent qalasynda qutqarýshylar «Naýryz» qalalyq saıabaǵynda «Qaýipsiz balalyq shaq aýmaǵy: ashyq terezelerden saq bolyńyzdar, sýdaǵy qaýipsizdik erejelerin saqtańyzdar, otpen oınamańyzdar» aktsııasyn ótkizdi. Turǵyndarǵa balalardyń terezeden qulap ketýiniń aldyn alý sharalary, sý aıdyndarynda qaýipsiz demalý erejeleri jáne órt qaýipsizdigi týraly túsindirildi. Mamandar tyıym salynǵan jerlerde shomylýdyń qaýiptiligin kórneki túrde kórsetip, kelýshilerdi órt sóndirý-qutqarý tehnıkasymen tanystyrdy jáne tótenshe jaǵdaılar kezindegi áreket etý algorıtmin eske saldy.
Atyraý oblysynda shomylý maýsymy resmı túrde ashylmaǵan, sebebi jabdyqtalǵan jaǵajaılar joq. Osyǵan baılanysty qutqarýshylar kúndelikti reıdter ótkizip, azamattarǵa jabdyqtalmaǵan jerlerde shomylýdyń qaýipti ekenin túsindiripjúr. Balalar men olardyń ata-analarymen profılaktıkalyq jumysqa erekshe nazar aýdarylady.
Shyǵys Qazaqstan oblysynda belgili demalys oryndarynda, sonyń ishinde Buqtyrma sý qoımasynyń jaǵalaýynda patrýldeý jumystary kúsheıtildi. Zamanaýı katerler qutqarýshylarǵa tótenshe jaǵdaılarǵa jedel áreket etýge múmkindik beredi. Jazǵy maýsym bastalǵaly beri 200-den astam reıd pen patrýldeý sharalary ótkizildi.
Jambyl oblysynda aktsııa aıasynda «Qaýipsiz balalyq shaq!» atty profılaktıkalyq is-shara ótkizildi. Onda mektep oqýshylaryna sýdaǵy qaýipsizdik erejeleri, órt qaýipsizdigi jáne tótenshe jaǵdaılar kezindegi áreket etý tártibi týraly túsindirildi. Balalar úshin vıktorınalar, taqyryptyq qoıylymdar jáne órt sóndirý-qutqarý tehnıkasynyń kórmesi uıymdastyryldy.
Jetisý oblysynda Alakól jáne Balqash kólderiniń jaǵalaýlarynda, sondaı-aq Taldyqorǵan qalasynyń jaǵajaıynda profılaktıkalyq is-sharalar ótip jatyr. Qutqarýshylar balalardy oıyn túrinde sýdaǵy qaýipsizdik erejelerine úıretip, túrli jarystar, vıktorınalar men sporttyq estafetalar ótkizedi.
Batys Qazaqstan oblysynda profılaktıkalyq jumys balalardyń jazǵy lagerleri men demalys oryndaryn qamtıdy. Qutqarýshylar sýdaǵy qaýipsizdik erejelerin, órt qaýipsizdigi sharalaryn eske salyp, balalardyń terezeden qulap ketýiniń aldyn alý jáne túrli tótenshe jaǵdaılar kezindegi áreket etý tártibi týraly túsindirý jumystaryn júrgizýde. Osyndaı is-sharalar Jańaózen qalasyndaǵy «Aqbóbek» balalar demalys ortalyǵynda da ótip jatyr, onda balalarǵa arnalǵan oqytý sabaqtary men sporttyq jarystar uıymdastyrylǵan.
TJM 68303 áskerı bóliminiń áskerı qyzmetshileri kún saıyn jaǵalaý aýmaqtaryn patrýldep, demalýshylarmen profılaktıkalyq áńgimeler júrgizedi jáne tótenshe jaǵdaılardyń aldyn alý sharalaryn qabyldaıdy.
-TJM balalardyń qaýipsizdigi eresekterdiń jaýapkershiliginen bastalatynyn eske salady. Ata-analar balalardyń qaıda júrgenin únemi baqylap, olardy sý jaǵasynda qaraýsyz qaldyrmaýy jáne demalys úshin tek jabdyqtalǵan ári shomylýǵa ruqsat etilgen oryndardy tańdaýy qajet. «Balalardy sýdaǵy qaýipten saqtańyz!» profılaktıkalyq aktsııasy shomylý maýsymy boıy jalǵasyp, elimizdiń barlyq óńirin qamtıtyn bolady,-delingen habarlamada.
Buǵan deıin TJM shomylý maýsymynda sýdaǵy qaýipsizdik erejelerin saqtaýǵa shaqyrǵan bolatyn.
