Jazǵy demalys maýsymy: Alakól, Balqash jáne Býrabaıda qandaı ózgerister boldy
ASTANA. KAZINFORM - Elimizde jazǵy týrıstik maýsym qarqyn alyp keledi. Týrısterdiń jaıly ári qaýipsiz demalysyn qamtamasyz etý úshin memleket týrıstik ınfraqurylymdy damytýda aýqymdy jumys júrgizip jatyr, dep habarlaıdy QR týrızm jáne sport mınıstrliginiń baspasóz qyzmeti.
Alakólde kólik joldary jańartylyp, qosymsha temirjol jáne áýe reısteri ashyldy. Jaǵalaý boıyna 100 qoqys konteıneri, 40 kıim aýystyrý kabınasy, jańa qutqarý munaralary men bıodárethanalar ornatylyp, pırs jabdyqtaldy. Sondaı-aq jańa qutqarý stantsııasy paıdalanýǵa berildi.
Abaı oblysy jaǵalaýynda qutqarý stantsııasy, medıtsınalyq pýnktter jáne qaýipsizdikti qamtamasyz etý kesheni jumys isteıdi. Demalýshylarǵa qolaıly jaǵdaı jasaý úshin 175 qoqys konteıneri, 75 kıim aýystyrý orny, 35 dýsh kabınasy, 223 beınebaqylaý kamerasy, sanıtarııalyq toraptar jáne qutqarý ınfraqurylymy qarastyrylǵan.
Balqashta áýejaı jańǵyrtylyp, sýbsıdııalanatyn áýe reısteri ashyldy. Kommýnaldyq jaǵajaılar abattandyrylyp, qaýipsizdik sharalary kúsheıtildi. Al Býrabaıda jańa qutqarý stantsııalary salynyp, qosymsha qoqys jáshikteri, konteınerler men sanıtarııalyq toraptar ornatylyp jatyr.
-Alaıda eń zamanaýı ınfraqurylymnyń ózi tabıǵatty qorǵaýǵa degen jaýapkershilikti almastyra almaıdy. Demalys oryndarynyń tazalyǵy eń aldymen árbir kelýshiniń mádenıeti men tabıǵatqa degen janashyrlyǵyna baılanysty. Qoqysty arnaıy konteınerlerge tastap, tazalyqty saqtańyz! Osyndaı qarapaıym qaǵıdalardy ustaný arqyly kólderimizdi, taýlarymyzdy jáne ulttyq parkterimizdi keleshek urpaq pen mıllıondaǵan týrıst úshin taza ári kórkem kúıinde saqtaı alamyz,-delingen habarlamada.
Osyǵan deıin týrızm salasyn damytýdyń 2029 jylǵa deıingi tujyrymdamasy jańartylǵany týraly jazdyq.
