Jazǵy demalys kezinde oqýshylardyń qaı sanattary tegin ońaltýdan ótedi
ASTANA. KAZINFORM – Oqý-aǵartý mınıstrligi jazǵy demalys kezinde oqýshylarǵa qandaı jeńildikter qarastyrylǵanyn túsindirdi.
Balalardy saýyqtyrý ortalyqtarynda «Memlekettik bilim berý mekemelerindegi bilim alýshylar men tárbıelenýshilerdiń jekelegen sanattaryna qala syrtyndaǵy jáne mektep janyndaǵy lagerlerde demalýy úshin qujattar qabyldaý jáne joldama berý» memlekettik kórsetiletin qyzmetine sáıkes, kelesi sanattaǵy balalar tegin demalýǵa jáne saýyqtyrýdan ótýge quqyly:
- memlekettik ataýly áleýmettik kómekti alýǵa quqyǵy bar otbasylardan shyqqan balalar;
- jan basyna shaqqanda ortasha tabysy kúnkóris deńgeıinen tómen, memlekettik ataýly áleýmettik kómek almaıtyn otbasylardan shyqqan balalar;
- otbasylarda tárbıelenetin jetim balalar;
- ata-anasynyń qamqorlyǵynsyz qalǵan balalar;
- otbasylarda tárbıelenetin jetim balalar men ata-anasynyń qamqorlyǵynsyz qalǵan balalar;
- tótenshe jaǵdaılardyń saldarynan shuǵyl kómekti talap etetin otbasylardan shyqqan jáne bilim berý uıymynyń alqaly basqarý organy aıqyndaıtyn oqýshylardyń ózge de sanattaryna jatatyn balalar.
- Qazaqstan – balalardyń jazǵy demalysyn uıymdastyratyn sanaýly memleketterdiń biri.
Lagerlerde 3,1 mln balany, onyń ishinde áleýmettik osal toptaǵy 500 myńnan astam balany qamtý josparlanǵan. Sondaı-aq, «Qazaqstan halqyna» qory esebinen «Jazdyq joldama» jobasy aıasynda 10 myń balany qabyldaý eskerilgen, - delingen mınıstrliktiń Kazinform agenttigine bergen jaýabynda.
Eske salsaq, Oqý-aǵartý mınıstrligi bıylǵy sońǵy qońyraý men mektep birtirý keshterin ótkizý tártibine qatysty túsinik berdi.
Budan buryn habarlanǵandaı, Sanıtarııalyq-epıdemıologııalyq baqylaý komıteti lagerlerdiń jazǵy demalysqa daıyndyǵyn baqylaýǵa kiristi.