Jazǵy demalys: «Qazaqstan halqyna» qory 20 myń balaǵa tegin joldama beredi
ASTANA. KAZINFORM – Elimizde 10 myńnan astam demalys orynynda 3 mln jýyq bala jazǵy demalysyn ótkizedi. Bul týraly QR Oqý-aǵartý mınıstri Ǵanı Beısembaev Úkimet otyrysynda baıandady.
Balalardyń jazǵy demalysyn uıymdastyrýǵa qajetti barlyq normatıvtik-quqyqtyq aktiler daıyndaldy. Óńirlerdegi barlyq demalys ortalyqtarynyń tizimi jáne daıyndyǵy pysyqtaldy.
«Qazaqstan halqyna» qorynyń qoldaýymen «QH Jazdyq joldama» jobasymen 20 myń bala tegin demalýǵa múmkindik alady. Onyń ishinde sý tasqynynan zardap shekken óńirlerdiń oqýshylaryna, halyqtyń áleýmettik osal toptarynan jáne kópbalaly otbasydan shyqqan aýyl balalaryna basymdyq beriledi», - dedi mınıstr.
Dálirek aıtqanda, eldegi 10 743 demalys orynynda 2,9 mln bala jazǵy demalysyn ótkizedi. Onyń ishinde 10 myń bala jyl boıǵy saýyqtyrý ortalyqtarynda, 240 myń bala – maýsymdyq, 2,6 mln bala – mektep janyndaǵy, 75 myń bala – shatyrly jáne kıiz úıli demalys oryndarynda barady.
182 demalys ortalyqtarynyń 150-i maýsymnyń basynda iske qosylady. Al, qalǵan 32 demalys nysany 15 maýsymda óz jumysyn bastaıdy.
«Atyraý, Túrkistan, Aqtóbe oblystary balalardyń jazǵy demalyspen qamtylýyn arttyrý qajet. Balalardyń bos ýaqytyn uıymdastyrý baǵytyndaǵy eńbekpen, týrıstik, shyǵarmashylyq, ıntellektýaldyq is-sharalarmen 2,7 mln bala qamtylady. Jergilikti atqarýshy organdar balalardyń saýyqtyrý demalysyn, bos ýaqytyn jáne jumyspen qamtylýyn sapaly deńgeıde uıymdastyrýy qajet», - deıdi Ǵ. Beısembaev.
Jazǵy demalysty mazmundy uıymdastyrý maqsatynda 120 myń uıymdastyrýshy-pedagog arnaıy daıyndyqtan ótti. Oǵan qosymsha 12 myńnan astam stýdentter jáne eriktiler tartylmaq.
