Jazǵy demalys: 11 respýblıkalyq teatr oqýshylarǵa 45-ten astam qoıylym usynbaq

ASTANA. KAZINFORM – Mádenıet jáne aqparat mınıstriniń orynbasary Qanat Ysqaqov  Úkimet otyrysynda respýblıkalyq statýsy bar mádenı oshaqtar jazǵy demalys kezinde oqýshylarǵa ne usyna alatynyn málim etti.

- Jazda elimizdiń barlyq mektep oqýshylaryna mýzeıler men teatrlarǵa, ózge de mádenı mekemelerge tegin kirýge múmkindik jasalyp otyr. Tórt birdeı respýblıkalyq mýzeı: Astanadaǵy Ulttyq mýzeı, Almatydaǵy Ortalyq memlekettik mýzeı, Á.Qasteev atyndaǵy óner mýzeıi men Mádenıetterdi jaqyndastyrý ortalyǵy jaz boıy 150-ge jýyq tanymdyq is-shara ótkizýdi josparlap otyr. Olardyń qatarynda jazǵy lagerler, kórmeler, sheberlik sabaqtary, taqyryptyq kvester men oqý semınarlary bar, - dedi.

Aıtýynsha, 11 respýblıkalyq teatr jazda balalarǵa arnalǵan 45-ten astam qoıylym usynbaq.

- Teatr maýsymy shilde aıyna deıin jalǵasyp, 2 myńnan astam balany qamtý kózdelgen. Mınıstrlikke qarasty 3 respýblıkalyq kitaphanada da jazǵy mezgilde 2 myńnan astam adamdy qamtıtyn 30-ǵa jýyq is-shara josparlanǵan. Atap aıtqanda, ádebı kezdesýler, kitap kórmeleri, sheberlik sabaqtary men oqý kýrstary uıymdastyrylady, - dedi Qanat Ysqaqov.

Buǵan deıin balalardyń jazǵy demalysyn uıymdastyrýǵa arnalǵan respýblıkalyq shtab qurylǵanyn jazǵan edik.