Jazdyń úsh aıynda temirjol kólikterinde 327 jolaýshy bıletsiz mingen - QR kólik jáne kommýnıkatsııa mınıstrligi
ASTANA. 28 qyrkúıek. QazAqparat - QR Kólik jáne kommýnıkatsııa mınıstrliginiń Kóliktik baqylaý komıteti jaz maýsymynda jolaýshylar poıyzyna 399 tekserý júrgizdi.
Tekserýler barysynda sanıtarlyq normalardyń - 298 ret, órt qaýipsizdigi erejeleriniń - 111 ret buzylǵany jáne 327 jolaýshynyń temirjol kóligine bıletsiz mingeni anyqtaldy. Bul jaıynda atalǵan mınıstrliktiń málimetterinde habarlandy.
Jolaýshylardy, bagaj ben júkterdi temirjol kóligi arqyly tasymaldaý erejesi talaptaryn saqtamaý faktileri boıynsha 35 jumysshy ákimshilik jaýapkershilikke, 48 jumysshy tártiptik jaýapkershilikke tartylǵan bolsa, 28 jumysshymen eńbek sharty buzyldy.
Esterińizge salyp óteıik, aǵymdaǵy jyldyń qyrkúıek aıynda mınıstrlikte tasymaldaýshy-kompanııalardyń qatysýymen jınalys ótip, onda jazǵy maýsymda temirjol kóligi arqyly jolaýshylardy tasymaldaý Erejesiniń saqtalýyna júrgizilgen tekserýlerdiń qorytyndysy men anyqtalǵan buzýshylyqtar talqylanǵan bolatyn. Jınalysta QR Kólik jáne kommýnıkatsııa vıtse-mınıstri Qaırat Ábsattarov temirjol kóligi arqyly jolaýshylardy tasymaldaý jáne olarǵa sapaly servıstik qyzmet kórsetý halyq úshin áleýmettik mańyzdy qyzmetterdiń biri ekenin atap ótti.
Osyǵan oraı, tasymaldaýshylarǵa kórsetiletin qyzmetterdiń sapasyn arttyrý salasynda jańa tehnologııalardy engizýge baǵyttalǵan bıznes-protsesterdi ázirleý tapsyryldy. Jáne vagondardy jóndeý men tehnıkalyq qyzmet kórsetý sapasyn arttyrý, poıyzdardaǵy aýa baptaǵysh júıeleriniń jumys isteýin, órt qaýipsizdigi erejeleri men sanıtarlyq normalardyń saqtalýyn qamtamasyz etýge qajetti sharalardy qabyldaý tapsyryldy.
Budan ózge, tasymaldaýshylarǵa negizgi qyzmetteri jolaýshylarǵa qyzmet kórsetýmen baılanysty jumysshylardyń bilimi men biliktiligin arttyrý qajettiligi sonymen birge, olardyń óz jumystaryna degen jaýapkershiligi men qyzyǵýshylyǵyn arttyrýdy yntalandyrý máselesi de sóz boldy.
Kólik jáne kommýnıkatsııa mınıstrliginiń qurylymdyq bólimshelerine óz qyzmetine jaýapsyzdyqpen qaraıtyn tasymaldaýshylarǵa, jolaýshylardy tasymaldaý boıynsha qyzmet kórsetý talaptaryn buzǵan jaǵdaıda sýbsıdııa bólýdi doǵarý máselesin qaraý jáne qyzmet kórsetýshi personalǵa qoıylatyn biliktilik talaptaryn qaıta qaraý tapsyryldy.
