Jazdyń sońǵy kúninde birqatar óńirde jańbyr men qar jaýyp, jel soǵady
ASTANA. KAZINFORM – 31 tamyzda Qazaqstannyń basym bóliginde aýa raıy qubylyp, jańbyr, qar, naızaǵaı, burshaq jáne kúshti jel kútiledi, dep habarlaıdy «Qazgıdromet» RMK.
Sınoptıkterdiń málimetinshe, atmosferalyq fronttardyń ótýine baılanysty eldiń soltústik-batysynda, soltústiginde, ortalyǵynda, shyǵysynda jáne ońtústik-shyǵysynda naızaǵaı oınap, jańbyr jaýady. Kúndiz keı jerlerde burshaq jaýyp, daýyldy jel soǵady.
Túnde respýblıkanyń soltústik-batysy men ortalyǵynda jańbyr jáne qar túrindegi jaýyn-shashyn kútiledi.
Eldiń batysy men ońtústigi antıtsıklon sileminiń yqpalynda bolǵandyqtan, jaýyn-shashynsyz aýa raıy saqtalady.
– Respýblıka boıynsha jel kúsheıedi. Eldiń ońtústigi men ońtústik-shyǵysynda shańdy daýyl boljanady. Batys, soltústik-batys, soltústik, shyǵys jáne ortalyq óńirlerde túnde jáne tańerteń tuman túsedi, – delingen «Qazgıdromet» boljamynda.
Sonymen qatar birqatar óńirde órt qaýpi joǵary bolady. Batys Qazaqstan oblysynyń soltústik-batysynda, Aqtóbe oblysynyń soltústik-shyǵysynda, soltústik-batysy men ortalyǵynda, Qostanaı oblysynyń soltústik-batysy men shyǵysynda, Mańǵystaý oblysynyń ortalyǵynda jáne Qaraǵandy oblysynyń ortalyǵynda joǵary órt qaýpi saqtalady.
Qyzylorda, Túrkistan, Jambyl, Atyraý, Batys Qazaqstan jáne Aqtóbe oblystarynda, sondaı-aq Ulytaý oblysynda tótenshe órt qaýpi kútiledi.
Budan bólek, Mańǵystaý oblysynyń batysy men soltústiginde, Qostanaı oblysynyń ońtústigi, ońtústik-shyǵysy men ortalyǵynda, Qaraǵandy oblysynyń ońtústiginde, Abaı oblysynyń ońtústik-batysynda, Almaty oblysynyń batysy, shyǵysy men ortalyǵynda, Jetisý oblysynyń ońtústigi, shyǵysy men ortalyǵynda tótenshe órt qaýpi saqtalady.
