Jazda tamaqty 12 saǵattan artyq saqtamaǵan durys — dáriger

QYZYLORDA. KAZINFORM — Jaz — jedel ishek ınfektsııasy órshıtin mezgil. Sebebi nede, odan qalaı saqtanýǵa bolady? Bul týraly Qyzylorda oblystyq juqpaly aýrýlar aýrýhanasy bas dárigeriniń orynbasary Sharıpa Álıevadan surap bildik.

Maman kún ystyqta tamaq tez buzylatyndyqtan, adamdardyń ýlanýy da tez ekenin eskertti.

— Tamaqtyń buzylǵan-buzylmaǵanyn eń birinshi kezekte ıisi arqyly baıqaýǵa bolady. Biraq jazdygúni daıyn tamaqty 12 saǵattan artyq saqtamaǵan durys, onyń ózinde tońazytqyshta saqtaǵan abzal. Kún ystyqta úı jaǵdaıynda as ázirlegende túrli tuzdyqtardy az paıdalanýǵa keńes beremin. Óıtkeni tuzdyq qosylǵan taǵamdar tez buzylady jáne ol adam densaýlyǵyna óte qaýipti, — dedi Sharıpa Álıeva.

Osy kúni kóshe boıynda ne kóp, fast-fýd dúńgirshegi kóp. Dáriger jyldam daıyndalatyn taǵamdy tutynýdy qys, jaz demeı, barlyq ýaqytta shektegen durys dep esepteıdi.

— Onyń quramynda adam aǵzasyna zııandy túrli transmaı bolady. Sonyń áserinen as qorytý júıesinde aýyrlyq paıda bolyp, artyq salmaqtyń jınalýyna ákep soǵady. Arzanqol kafelerge barǵan da durys emes, baǵasyna saı arzan azyq-túlikten jasalǵan astan ýlaný qaýpi óte joǵary, — dedi ol.

Dáriger ⁠qaýyn-qarbyz jeýge áli erte dep otyr. Ony tek jazdyń sońǵy aılarynan bastap tutynýǵa keńes berdi.

— Sebebi tabıǵı ónim osy ýaqytta tolyq pisedi. Qazir dúken sórelerinde turǵan jemister hımııalyq jolmen pisken bolýy múmkin. Al odan ýlaný qaýpi óte joǵary. Kez kelgen jemis-jıdekti jaqsylap jýyp tutyný kerek, — dedi dáriger.

⁠Jedel ishek aýrýyna kóbine balalar shaldyǵady. Óıtkeni olar qarapaıym gıgıenalyq sharalardy saqtaı bermeıdi. 

— Bala udaıy ata-ananyń baqylaýynda bolýy kerek. Úlkender balalardyń tamaǵyn ázirleýde saq bolyp, tek jańadan ázirlengen asty usynýy tıis. Balada tamaqtan ýlaný belgileri baıqalǵan boıda dárigerge júgingen abzal, — dedi Sharıpa Álıeva.

Biz buǵan deıin Qyzylorda oblysynda jyl basynan beri jedel ishek ınfektsııasyn juqtyrýdyń 342 jaǵdaıy tirkelgenin jazdyq. Bul ótken jyldyń osy merzimimen salystyrǵanda 7 jaǵdaıǵa tómen.