Jazda sý kóligine jasalǵan tekseristerdiń nátıjesinde talaptardy buzýdyń kóptegen faktileri anyqtaldy
ASTANA. 5 qyrkúıek. QazAqparat - Qazaqstanda 500-den astam shaǵyn kólemdi kemelerdiń paıdalanylýyna tyıym salyndy. Jazǵy kezeńde sý kóliginde ótkizilgen tekseristerdiń nátıjesinde kóptegen buzýshylyqtar men sáıkesizdikter anyqtaldy. Bul týraly QR KKM baspasóz qyzmetinen habarlandy.
QR KKM Kóliktik baqylaý komıtetiniń málimetteri boıynsha, 2013 jylǵy 1 maýsym men 31 tamyz aralyǵynda Qazaqstanda jyl saıynǵy respýblıkalyq «Skýter» aktsııasy ótkizildi. Atalǵan is-sharanyń maqsaty shaǵyn ólshemdi kemelerge jatatyn syıymdylyǵy 12 adamnan aspaıtyn qaıyqtardy, gıdrotsıkldardy, katamarandardy, shlıýpkalardy, katerlerdi qaýipsiz paıdalanýdy, sonymen qatar respýblıka sýlaryndaǵy kópshilik demalatyn aımaqtar men oryndarda adamnyń ómiri men densaýlyǵyn saqtaýdy qamtamasyz etý bolyp tabylady.
Aktsııa barysynda 2 776 shaǵyn ólshemdi keme tekseristen ótkizildi, bul ótken jylǵy kórsetkishpen salystyrǵanda 40 paıyzǵa artyq bolyp otyr. Tekserister nátıjesinde 606 ákimshilik aıyppul salyndy. Ákimshilik quqyq buzýshylyqtardyń basym kópshiligi Shyǵys Qazaqstan, Almaty, Atyraý, Ońtústik Qazaqstan jáne Qyzylorda oblystarynda anyqtaldy.
Anyqtalǵan buzýshylyqtardyń negizgi túrleri atap aıtsaq, olar:
- kemeni basqarý quqyǵynsyz paıdalaný - 204 oqıǵa;
- tehnıkalyq baıqaýdan ótpegen kemelerdi paıdalaný - 135 oqıǵa;
- tirkelmegen kemelerdi paıdalaný - 84 oqıǵa;
- borttyq nomerleri joq kemelerdi paıdalaný - 83 oqıǵa;
- kemelerde qutqarý quraldarynyń joqtyǵy - 41 oqıǵa.
Sonymen qatar, Komıtettiń aýmaqtyq organdary shaǵyn ólshemdi flottyń qaýipsiz paıdalanýyn retteıtin zańnamanyń talaptaryn túsindirý jóninde shaǵyn ólshemdi kemelerdiń ıelerimen, baza-turaqtarynyń jáne demalys aımaqtarynyń ıelerimen profılaktıkalyq jumystar ótkizgen.
