Jazda órtenip, turǵyndar terezeden sekirgen almatylyq «Aqkent» kesheni jóndeldi
Bıyl tamyzda otqa oranǵan «Aqkent» turǵyn úı keshenindegi 96 páter órtten keıin qalpyna keldi, dep habarlaıdy Kazinform.
Baspaldaq alańdary, dálizder jóndeldi, páterler árlenip, elektr montajdaý jáne kabel aýystyryldy, alty páterdiń eki qabatty terezeleri aýystyryldy, seksen páterdiń kireberis esigi jóndelgen.
Adamdardyń qaýipsizdigin qamtamasyz etetin ǵımarattyń evakýatsııalyq joldary tekserildi.
Alataý aýdanynyń ákimi Azamat Qaldybekov órtten zardap shekken turǵyndardyń jóndeýden keıingi úıin kózimen kórdi.
Ermek Nurbosynov qyzyl jalyn kezinde bári synǵanyn aıtyp, úıdi qalpyna keltirgeni úshin ákimdikke alǵysyn bildiredi.
«Kúni-túni bel jazbaı eńbek etip, qysqa merzimde jumysshylar bárin qalpyna keltirdi. Bizge qol ushyn sozyp, kómekteskenine óte rızamyz», — dedi ol.
Bátıma Kójekbaeva ákimdiktiń jóndeýge kómekteskenin jáne turǵyndardy nazardan tys qaldyrmaıtynyn atap ótti.
«Otqa oranǵan páterdi jóndeýden keıin úıimizge qaıta oraldyq. Jóndeý jumystary jaqsy jasalǵan, úıimiz jyly, taza. Kóp rahmet. Bizge birneshe ret kelip, qal-jaǵdaıymyzdy bilip turdy», — dedi ol.
Turǵyn úılerdi qalpyna keltirýge jáne ýaqytsha qonystanýǵa ákimdik 168 mln teńgeden astam qarajat bóldi.
Onyń 100 mln teńgesi jóndeýge jumsalsa, taǵy 300 mln teńgeni qurylys salýshy kompanııa bólgen.
Eske salsaq, 1 tamyzda Almatydaǵy «Aqkent» shaǵynaýdanynda 16 qabatty úıden órt shyǵyp, 49 adam zardap shekti, bir áıel alǵan jaraqatynan qaıtys boldy.
