Jazda Qazaqstannyń aqyly joldarymen 24 mln-nan astam sapar jasaldy

ASTANA. KAZINFORM – 2025 jylǵy jaz Qazaqstandaǵy avtojol qozǵalysy boıynsha eń belsendi maýsymdardyń biri boldy, dep jazdy QazAvtoJol.

Derekke qaraǵanda, eldiń aqyly trassalarymen 24 mln-nan astam sapar jasaldy. Mundaı ósim demalys maýsymymen qatar, ishki týrızmniń damýy men sońǵy jyldary júzege asqan ınfraqurylymdyq jobalardyń nátıjesi bolyp otyr.

Qazirgi zamanǵy respýblıkalyq joldar iri qalalardy baılanystyryp qana qoımaı, týrıstik nysandarǵa qoljetimdilikti arttyrdy. Bıyl segiz óńirde 2 myń shaqyrymnan astam jolǵa jóndeý júrgizilip, tanymal demalys oryndary men mádenı nysandarǵa baratyn baǵyttar jaqsartylýda.

Eń tanymal baǵyttar:

• Astana – Temirtaý (1,44 mln sapar)

• Astana – Şýchınsk (1,36 mln)

• Almaty – Qonaev – Taldyqorǵan (5,4 mln)

• Almaty – Qorǵas (696 myń)

• Shymkent – Taraz – Qaınar (5,1 mln-nan astam)

• Shymkent – Ózbekstan shekarasy (2,66 mln)

• Qostanaı – Denısovka (843 myń)

• Pavlodar – Semeı – Qalbataý (448 myń)

Sondaı-aq, Reseıge baǵyttalǵan saparlar da belsendi boldy, shekara mańyndaǵy joldarmen 700 myńnan astam kólik ótken.

Sarapshylardyń aıtýynsha, «Astana – Almaty», «Taldyqorǵan – Óskemen», «Atyraý – Astrahan», «Aqtóbe – Qandyaǵash» sekildi iri jobalardyń aıaqtalýy avtotýrızmge tyń serpin berdi. Endi qazaqstandyqtar Kaspıı teńizine, Altaıǵa, Jetisý óńirine nemese ortalyq qalalarǵa esh qıyndyqsyz sapar shegýge múmkindik aldy.

Aqyly joldar jelisiniń damýy ishki týrızmdi órkendetip, Qazaqstandaǵy kýrorttar men tarıhı baǵyttarǵa qyzyǵýshylyqty arttyryp otyr.

Aıta keteıik, Qazaqstanda aqyly avtojoldardy tegin paıdalanatyn kólik sanattary belgili boldy.