Jazda Qazaqstanda qosymsha poıyzdar men áýe reısteri iske qosylady

QR Kólik mınıstrliginiń málimetinshe, jolaýshylar suranysynyń artýyna baılanysty kólik kompanııalarymen birlesip týrıstik baǵyttar boıynsha temirjol jáne áýe qatynasy keńeıtilýde.

2026 jyldyń jazǵy maýsymynda 15 qosymsha temirjol marshrýty uıymdastyrylady. Qosymsha poıyzdar 16 maýsymnan bastap qatynaıdy.

Jańa baǵyttar Astana, Almaty, Qaraǵandy, Aqtóbe, Semeı, Óskemen, Qyzylorda jáne Pavlodar qalalarynan Dostyq pen Balqash sııaqty týrıstik aımaqtarǵa qatynaıdy.

Bul sharalar jaz mezgilinde poıyzdarda shamamen 550 myń qosymsha oryn ashýǵa múmkindik beredi.

Sonymen qatar jolaýshylar aǵyny kóbeıgen jaǵdaıda qoldanystaǵy poıyz quramdary da ulǵaıtylady.

Jazǵy maýsymda poıyzdardaǵy vagon sany orta eseppen 19-21 vagonǵa deıin ósedi. Al maýsymaralyq kezeńde bul kórsetkish 13-15 vagondy quraıdy.

Sondaı-aq 2026 jylǵy 1 maýsymnan bastap Qaraǵandy – Balqash baǵyty boıynsha №219/220 jolaýshylar poıyzy iske qosylady.

Áýe tasymaly boıynsha da qosymsha reıster ashylady.

2026 jyldyń maýsym-tamyz aılary aralyǵynda Astana – Balqash, Úrjar, Úsharal jáne Almaty – Balqash, Úrjar, Úsharal baǵyttary boıynsha aptasyna jeti reıske deıin qosymsha ushaq qatynaıdy.

Bul baǵyttardaǵy áýe bıletteriniń baǵasy áleýmettik qoljetimdi deńgeıde saqtalady. Quny 16 myńnan 20 myń teńgege deıin bolady.

Mınıstrlik málimetinshe, 2026 jyly Qazaqstanda aptasyna 813 reıs jıiligimen 60 ishki áýe baǵyty boıynsha turaqty qatynas júzege asyrylady.

Turaqty áýe marshrýttaryn sýbsıdııalaý baǵdarlamasy aıasynda 24 baǵytqa, onyń ishinde 16 týrıstik marshrýtqa 6,4 mlrd teńge bólingen.

Aıta keteıik, Izmır men Almaty arasynda tikeleı áýe reısi ashylady.