Jazda qant qymbattamaıdy dep úmittenemin - Almaty ákimi
Qala basshysymen kezdesýge kelgen Naýryzbaı aýdany turǵyndarynyń biri qymbatshylyq máselesine toqtaldy.
«Baǵanyń ósýi máselesine túsinikteme berýińizdi suraımyn. Bul baǵytta ne isteledi? Baǵany turaqtandyrý úshin qandaı sharalar qabyldanyp jatyr»,- dep surady turǵyn.
Erbolat Dosaev Almatyda baǵany turaqtandyrý úshin 15 mlrd teńge bólingenin málimdedi.
«Baǵa turaqtylyǵy – qala ákimdigi úshin mańyzdy másele jáne basty mindet. Biz ótken jyldyń kúzinde negizgi ónimderge tosqaýyl qoıý jáne turaqtandyrý jumystaryn bastadyq. Maýsymnan tys ýaqytta arnaıy sharttar jasaldy. Almaty baǵany turaqtandyrýǵa eń kóp qarajat bóldi – 15 mlrd teńge. Kóktemde naýryz aıynyń ortasynan bastap, alǵashqy ónimderdi alamyz. Baǵasy shuǵyl kóteriletin pozıtsııalar boıynsha baǵalardy turaqtandyramyz dep úmittenemiz», - dedi ol.
Aıtýynsha, Almatyda monopolııalyq «Altyn Ordadan» basqa kóterme jetkizýshiler paıda boldy (búginde qalaǵa kókónisterdiń, jemister men ettiń 75%-y osy núkte arqyly jetkiziledi). Saýda jelileriniń biri jetkizýshilermen tikeleı jumys isteı bastady, sonyń arqasynda baǵalar tómendedi.
«Aqsý qant» zaýytymen 2,6 mlrd teńgege shart jasadyq. Jazda qant baǵasy kóterilmeıdi dep úmittenemin. Ózińiz bilesiz, nannyń baǵasy kóterilgen joq, óıtkeni biz ony sýbsıdııalaımyz, jergilikti bıýdjetten qosymsha aqsha bóldik. Ókinishke qaraı, azyq-túlik emes taýarlardyń baǵasy da ósip jatyr, bul – fakt. Jalpy, geosaıası jaǵdaıǵa baılanysty kólik logıstıkasy buzyldy, biraq birte-birte bizdiń kompanııalar túrli joldardy izdeıdi, jańa jetkizýshiler paıda boldy», - dep atap ótti shahar basshysy.
Sonymen qatar, ol baǵa máselesi erekshe baqylaýda ustalatynyn jetkizdi.
«Tikeleı Naýryzbaı aýdanyna keletin bolsaq, kóterme saýda deńgeıi nashar damyǵan, dúkender az, básekelestik joq. Bul máselemen aýdan ákimdigimen de jumys isteımiz, turǵyndardy sapaly saýdamen qamtamasyz etý úshin kásipkerlerdi tartamyz», - dedi Erbolat Dosaev.