Jazda el halqy qaı aqyly jolmen kóp júrdi
ASTANA. KAZINFORM — Bıyl jazda Qazaqstandaǵy aqyly joldarmen 25,8 mln-nan astam kólik júrip ótti. Eń kóp suranys Almaty – Qonaev baǵytyna túsken.
«QazAvtoJol» málimetine qaraǵanda, 2026 jylǵy 1 maýsym men 31 tamyz aralyǵynda respýblıkalyq mańyzy bar avtomobıl joldarynyń 28 aqyly ýchaskesinde 25 818 167 kólik júrip ótý deregi tirkeldi. Bul táýligine orta eseppen 281 myńǵa jýyq kólikke teń.
Úsh aıdaǵy kólik qozǵalysy boıynsha birinshi orynda Almaty — Qonaev baǵyty tur. Bul ýchaskemen 4,31 mln-nan astam kólik ótken.
Ekinshi orynda Shymkent — Ózbekstan shekarasy baǵyty ornalasqan. Munda 2,68 mln kólik júrip ótken. Úshinshi orynda Shymkent — Taraz ýchaskesi — 1,87 mln kólik.
Jazdaǵy kólik qozǵalysy joǵary bolǵan basqa baǵyttardyń qatarynda Taraz — Qaınar (1,81 mln), Astana — Temirtaý (1,49 mln), Astana — Şýchınsk (1,46 mln), Shymkent — Qyzylorda (1,4 mln) jáne Qonaev — Taldyqorǵan (1,2 mln) bar.
Al alǵashqy ondyqtaǵy aqyly joldardyń ózinde 18,2 mln-nan astam kólik júrip ótken. Bul — barlyq aqyly joldaǵy jazǵy trafıktiń shamamen 71 paıyzy.
Kólik qozǵalysynyń geografııasy jaz aılarynda iri qalalardy baılanystyratyn baǵyttarmen birge týrıstik jáne demalys oryndaryna aparatyn joldarǵa da suranys joǵary bolǵanyn kórsetedi. Atap aıtqanda, Almaty — Qonaev, Astana — Şýchınsk, Şýchınsk — Kókshetaý, Qaraǵandy — Balqash, Qyzylorda — Aral jáne Úsharal — Dostyq baǵyttary ishki týrızm úshin mańyzdy kólik arnalaryna aınalyp keledi.
«QazAvtoJol» málimetinshe, jol ınfraqurylymyn damytý avtotýrızmniń ósýine de yqpal etedi. Qazir respýblıkalyq mańyzy bar joldardyń boıynda 1 500-ge jýyq jol boıyndaǵy servıs nysany jumys isteıdi. Olardyń qatarynda janarmaı quıý stantsııalary, tamaqtaný oryndary, qonaqúıler, demalys oryndary men sanıtarlyq nysandar bar.
Sonymen qatar respýblıkalyq avtojoldar boıynda elektromobılderge arnalǵan 60-tan astam elektr qýattaý stantsııasy jumys istep tur.
Jazdaǵy kólik júrip ótý sany boıynsha aqyly joldardyń alǵashqy ondyǵy:
-
Almaty — Qonaev — 4 310 266;
-
Shymkent — Ózbekstan shekarasy — 2 682 324;
-
Shymkent — Taraz — 1 872 053;
-
Taraz — Qaınar — 1 815 796;
-
Astana — Temirtaý — 1 493 818;
-
Astana — Şýchınsk — 1 460 655;
-
Shymkent — Qyzylorda — 1 408 438;
-
Qonaev — Taldyqorǵan — 1 202 409;
-
Şýchınsk — Kókshetaý — 1 063 372;
-
Taraz aınalma joly — 945 725.
Eske salaıyq, munyń aldynda aqyly jolda aqshany qalaı únemdeýge bolatynyn jazǵanbyz.
