Jazda «Býrabaı» ulttyq parkine jarty mıllıonǵa jýyq adam keldi
ASTANA. KAZINFORM – 1 maýsym men 31 tamyz aralyǵynda Býrabaıǵa 450 myńnan astam adam keldi. Bul ótken jylmen salystyrǵanda 20 myńǵa artyq.
«Býrabaı» memlekettik ulttyq parki dırektsııasynyń málimetinshe, jyl basynan beri 8 aıda Ulttyq park 650 myńnan astam qonaqty qabyldady. 2023 jyldyń 8 aıyndaǵy kórsetkish – 550,7 myń adam.
Býrabaı eldik jáne halyqaralyq deńgeıdegi sporttyq is-sharalar ótetin orynǵa aınalyp keledi. Bul týrısterdi tartýǵa jáne Býrabaıdyń tanymaldyǵyn arttyrýǵa yqpal etedi. «X-Waters Kazakhstan 2024», «Aqbura Bay trail 2024» syndy sporttyq is-sharalarǵa myńdaǵan adam kelgeni osyny kórsetedi.
«Infraqurylymdy damytý jáne ekskýrsııalyq baǵdarlamalardy keńeıtý Qazaqstannan ǵana emes, shetelden de demalýshylardy tartady. Jazda saıabaqqa 8 myńnan astam sheteldik týrıst keldi. Qonaqtardyń geografııasy boıynsha TOP-5 el qatarynda Reseı, Ózbekstan, Túrikmenstan, Germanııa jáne Qytaı bar. AQSh azamattary qyzyǵýshylyq tanytyp otyr», - dedi «Býrabaı» MUTP dırektorynyń damý jónindegi orynbasary Venera Nuǵymanova.
Saıabaq ekologııalyq týrızmdi damytýǵa erekshe nazar aýdara otyryp, jaıly demalý úshin jaǵdaı jasap jatyr. Aımaqtyń tabıǵatymen jaqynyraq tanysýǵa kómektesetin ekologııalyq soqpaqtar men týrıstik marshrýttar arqyly osy jazda 9 myńnan astam adamdy júrip ótti.
Jazǵy maýsymnyń qorytyndysy «Býrabaı» ulttyq parkiniń Qazaqstandaǵy ishki týrızmniń jetekshi baǵyttarynyń biri retindegi pozıtsııasy nyǵaıa túskenin kórsetip otyr.
