Jazda aýa raıy qandaı bolady - sınoptıkter boljamy
ASTANA. QazAqparat - «Qazgıdromet» RMK uzaq merzimdi aýa raıy boljamyn jarııalady, dep habarlaıdy QazAqparat tilshisi.
«Jazdyń alǵashqy eki aıy salqyn bolady, jańbyr kóp jaýady degen boljam bar. Tek batys pen ońtústik óńirlerde ǵana jańbyr normadan az jaýady. Tamyz aıyna keletin bolsaq, elimizdiń batysynda ystyq kún raıy kútilýde. Aýanyń ortasha aılyq temperatýrasy klımattyq normadan bir-eki gradýs joǵary bolady jáne jańbyr az jaýady degen boljam bar», - dedi «Qazgıdromet» RMK uzaq merzimdi aýa raıy boljamy basqarmasynyń basshysy Gúlmıra Aqysheva Astanada ótken baspasóz máslıxatynda.
Onyń aıtýynsha, uzaq merzimdi boljamdar áli de ózgerýi múmkin. Sebebi eki-úsh aıdan keıingi aýa temperatýrasyn dóp basyp aıtý qıyn.
«Aýa raıynyń uzaq merzimdi boljamyn ázirlegende biz mindetti túrde statıstıka ádisin qoldanamyz. Sonymen qatar, Dúnıejúzilik meteouıymynyń quramyna kiretin, ozyq texnologııalarmen, esepteýish sýper kompıýterlermen jabdyqtalǵan álemniń 13 jetekshi meteo ortalyqtardyń jasaıtyn jahandyq-maýsymdyq boljamdaryna súıenemiz. Biraq aýa raıy boljamynyń uzaqtyǵy neǵurlym ulǵaıǵan saıyn soǵurlym aǵattyq ta ketip jatady. Ol atmosferanyń retsiz tabıǵatyna baılanysty. Alaıda, aýa aǵyndary únemi qozǵalysta bolǵandyqtan sońǵy kórteskishterge áser etetin kóptegen faktorlar bar. Sondyqtan berilip otyrǵan maýsymdyq boljamdarymyzdy konsýltatıvtik boljam retinde paıdalanǵandaryńyz abzal. Bunyń barlyǵy aılyq, onkúndik jáne qysqa merzimdi boljamdarmen naqtylanady», - dep atap kórsetti G.Aqysheva.
Aıta keteıik, búgingi baspasóz máslıxatynda sáýir aıyndaǵy aýa raıynyń boljamy da jasaldy. Kelesi aıda aıazdar bolady.
