Jazda Almaty oblysynda qaıda barýǵa bolady: eń kórikti 7 týrıstik baǵyt
ASTANA. KAZINFORM – Qazaqstanda kópshilikke tanymal demalys oryndarymen qatar, jazǵy saıahatqa laıyq, tabıǵaty erekshe ári kórikti baǵyttar da az emes. Sonyń biri – Almaty oblysy.
Óńir asqar taýlarymen, tereń shatqaldarymen, kórkem jaılaýlarymen, móldir kólderimen jáne qaıtalanbas tabıǵı landshafttarymen erekshelenedi. Almaty oblysy jazǵy demalys, ekotýrızm, trekkıng jáne otbasylyq saıahat úshin qolaıly baǵyttardyń biri sanalady.
– Almaty oblysynda tabıǵat aıasynda demalýǵa, belsendi týrızmmen aınalysýǵa jáne erekshe áser alýǵa múmkindik beretin kóptegen oryn bar. Óńirdegi ár baǵyt ózindik tabıǵı ereksheligimen jáne týrıstik áleýetimen qundy, – delingen Týrızm jáne sport mınıstrliginiń aqparatynda.
Saıahatshylar arasynda suranysqa ıe baǵyttardyń biri – Sharyn ulttyq tabıǵı parki. Ol mıllıondaǵan jyl boıy qalyptasqan erekshe shatqaldarymen tanymal. Munda Qamaldar ańǵaryn, Sharyn ózenin, Shaǵan toǵaıyn jáne panoramalyq kórinis alańdaryn tamashalaýǵa bolady.
Taǵy bir erekshe baǵyt – Uıǵyr aýdany. Bul óńir qyzǵylt tústi tóbelerimen, kanondarymen jáne erekshe tabıǵı bederimen kóz tartady. Geotýrızm men fototýrızmdi unatatyndar úshin qolaıly oryn.
Qarasaı aýdanynda Úshqońyr jaılaýy, Kóklaısaı, Qaskeleń shatqaly, Aqsaı saıy jáne taý etegindegi demalys aımaqtary ornalasqan. Bul baǵyt bir kúndik saıahat pen belsendi demalysqa yńǵaıly.
Balqash – Baqanas baǵyty da týrıster úshin qyzyqty oryndardyń biri. Munda Іle ózeniniń tabıǵaty men shóleıt aımaq ekojúıesi úılesim tapqan. Baǵyt djıp-týr, ekspedıtsııa jáne tabıǵat aıasyndaǵy tynysh demalysqa qolaıly.
Talǵar aýdany Іle Alataýynyń baýraıyndaǵy kórkem tabıǵatymen belgili. Aqtas platosy, Qotyrbulaq shatqaly, Besqaınar baǵyty men Sıvers alma baqtary týrısterdi erekshe áserge bóleıdi.
Eńbekshiqazaq aýdany taý shatqaldary, sarqyramalary jáne sý qoımalarymen tanymal. Assy ústirti, Túrgen shatqalyndaǵy Qaıraq sarqyramasy, Bartogaı sý qoımasy men Baqaı taýlary – óńirdiń basty tabıǵı nysandarynyń qatarynda.
Raıymbek aýdany da tabıǵat áýesqoılary úshin erekshe baǵyt sanalady. Han Táńiri shyńy, Tuzkól kóli, Qarqara jáne Shalkóde jaılaýlary, Kegen–Qarqara baǵytyndaǵy taý sarqyramalary trekkıng pen etnotýrızmge múmkindik beredi.
Almaty oblysynyń bul baǵyttary ishki týrızmdi damytýǵa jáne óńirdiń tabıǵı baılyǵyn keńinen tanytýǵa yqpal etedi.
Aıta keteıik, Almaty oblysy týrısterdi nemen qyzyqtyratynyn mynaý siltemeden oqı alasyz.
