Jazda Alakólge qatynaıtyn qosymsha poıyzdar sany artady
ASTANA. KAZINFORM – 2026 jylǵy jazǵy maýsymda «Jolaýshylar tasymaly» AQ shamamen 4,2 mln jolaýshy tasymaldaýdy josparlap otyr.
Onyń ishinde 230 myńǵa jýyq jolaýshynyń Alakól kýrorttyq aımaǵyna qatynaýy kútiledi.
Maýsymdyq suranystyń artýyna baılanysty QTJ jazǵy kezeńde 15 qosymsha temirjol baǵytyn iske qospaq.
Alakól baǵytyna poıyzdar Astana, Almaty, Semeı, Óskemen, Qyzylorda jáne Pavlodar qalalarynan qatynaıdy.
Qosymsha poıyzdar men tirkeme vagondar myna baǵyttar boıynsha uıymdastyrylady:
– №54/53 «Nurly jol – Dostyq»;
– №253/254 «Nurly jol – Dostyq»;
– №207/208 «Almaty – Dostyq»;
– №211/212 «Almaty – Dostyq»;
– №221/222 «Almaty – Dostyq»;
– №457/458 «Semeı – Dostyq»;
– №459/460 «Óskemen – Dostyq»;
– «Qyzylorda – Dostyq» tirkeme vagondary;
– «Almaty – Dostyq» tirkeme vagondary;
– «Pavlodar – Dostyq» tirkeme vagondary;
– №201/202 «Almaty – Nurly jol»;
– №203/204 «Nurly jol – Shymkent»;
– №205/206 «Aqtóbe – Nurly jol»;
– №219/220 «Qaraǵandy – Balqash»;
– №231/232 «Almaty-2 – Semeı».
– Jazǵy maýsymda jolaýshylar tasymalyna suranys jyl saıyn artady. Ásirese kýrorttyq aımaqtar men iri qalalarǵa qatynaıtyn baǵyttarǵa qyzyǵýshylyq joǵary. Osy kezeńde jolaýshylarǵa qyzmet kórsetý úshin 2 myńnan astam vagon paıdalanylady, – dedi «Jolaýshylar tasymaly» AQ Basqarma tóraǵasy Dııar Núsipqojanov.
Onyń aıtýynsha, vagondardyń 86 paıyzy kondıtsıoner júıesimen jabdyqtalǵan.
Barlyq jyljymaly quram jazǵy tasymal maýsymyna aldyn ala daıyndalyp, tehnıkalyq tekserýden jáne sanıtarııalyq óńdeýden ótken.
Kompanııa málimetinshe, poıyzdarda vagondardy tazalaý men sanıtarııalyq-gıgıenalyq quraldarmen qamtamasyz etý bekitilgen standarttarǵa sáıkes júrgiziledi.
Sonymen qatar jolaýshylar úshin fılm kórýge jáne mýzyka tyńdaýǵa múmkindik beretin mýltımedııalyq oıyn-saýyq portaly qoljetimdi bolady.
Erekshe qajettiligi bar azamattarǵa arnaıy jabdyqtalǵan vagondar qarastyrylǵan.
Aıta keteıik, Alakólde alǵash ret ámbebap qutqarý bólimshesi ashyldy.
