Jazataıym oqıǵalardan japa shekken tórt myńǵa tarta azamat saqtandyrý kompanııalarynan ótemaqy ala almaı qalýy múmkin - UB
ASTANA. QazAqparat - Jazataıym oqıǵalardan japa shekken tórt myńǵa tarta azamat saqtandyrý kompanııalarynan ótemaqy ala almaı qalýy múmkin.
Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine saqtandyrý jáne ıslamdyq qarjylandyrý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
QR Ulttyq banki Tóraǵasynyń orynbasary Danııar Aqyshevtyń aıtýynsha, zań jobasymen jazataıym oqıǵalardan qyzmetkerlerdi mindetti saqtandyrý sharalaryn jetildirý qarastyrylyp otyr. Bul rette UB ókili mindetti saqtandyrýdyń qoldanystaǵy úlgisi teńgerimdi emes ári áleýmettik jáne júıeli táýekelderdiń joǵary deńgeıine ıe ekenin atap ótti. «Buǵan mysal retinde Alıans-polıs saqtandyrý kompanııasynyń «ArselorMıttalTemirtaý» jumysshylaryna tólemdi toqtatý faktilerin, eńbekti qorǵaý salasyndaǵy kóptegen zań buzýshylyqtardyń oryn alýyn alǵa tartýǵa bolady. Jalpy, Ulttyq bank pen sarapshylardyń baǵalaýy boıynsha saqtandyrý kompanııalardyń qordalanǵan shyǵyndary 80 mlrd. teńge deńgeıinde kútiledi. Bul saqtandyrý kompanııalarynyń óz qarajattary men rezervterinen 38 mlrd. teńgege artyq. Bundaı shyǵyndardy qysqa jáne orta merzimde óteý saqtandyrý kompanııalarynyń joıylýyna ákep soǵýy múmkin. Soǵan sáıkes, negizgi bóligin metallýrgııa salasynyń 3 myń 941 japa shekken qyzmetkerleri ótemaqylaryn ala almaı qalýy múmkin. Budan bólek, atalǵan kompanııalarda zeınetaqy annýıtetterin alý kezeginde turǵan zeınetkerlerdiń ózi 32 myń adamdy quraıdy. Olarǵa da tólem toqtatylýy ári sonyń saldarynan áleýmettik narazylyq týyndaýy múmkin», - dedi Danııar Aqyshev.
Onyń aıtýynsha, osyǵan oraı búgingi kúni Úkimet pen Ulttyq bank birlese otyryp, mindetti saqtandyrý problemasyn tujyrymdamaly túrde sheshý joldaryn qarastyrýda. Atap aıtqanda, júıege saqtandyrý tólemderin ońtaılandyrýǵa, úılestirýge baǵyttalǵan parametrlik ózgerister engizý qarastyrylady. «Ekinshiden, azamattardyń ómiri men densaýlyǵyna zııany tıgeni úshin ótemaqy tóleýdiń biryńǵaı tártibin bekitý usynylady. Bul negizinen tutyný baǵalarynyń ózgerýine baılanysty bolyp tabylady. Úshinshiden, shyǵyndardyń naqty statıstıkasyn esepke ala otyryp, saqtandyrý tarıftaryn belgileý qarastyrylady. Budan bólek, tegin medıtsınalyq kómekti esepke ala otyryp, emdeýge ketetin shyǵyndardyń ornyn jabý kózdeledi», - dedi D. Aqyshev.
