Jazasyn ótep jatqan Baqytbek Esentaev jýrnalıstermen suhbattasýdan bas tartty

TALDYQORǴAN. QazAqparat - Almaty oblystyq jastar saıasaty máseleleri basqarmasy jáne oblystyq jastar resýrstyq ortalyǵy LA-155/8 túzetý mekemesinde shaǵyn fýtboldan jarys uıymdastyrǵan bolatyn. Onyń maqsaty - jazasyn óteýshilerdi sportqa baýlyp, salaýatty ómir saltyn nasıhattaý. Osy mekemede jazasyn ótep jatqan Baqytbek Esentaev atalǵan sharaǵa barǵan jýrnalısterge suhbat berip, beınekameraǵa túsýden bas tartty, dep habarlaıdy QazAqparat tilshisi.

Alaıda Baıan Maqsatqyzynyń burynǵy kúıeýiniń jaǵdaıy týraly qatań rejimdegi túzetý mekemesi basshysynyń orynbasary Álıhan Moldybaev baıandap berdi. «Sottalýshy Esentaev 9 jyldyq jazasynyń bir jylǵa jýyq ýaqytyn ótep shyqty.  Oǵan qandaı da bir jeńildik kórsetilip jatqan joq.  Tipti túrme ishindegi jumysqa da ornalastyrylmaǵan. Sebebi bos jumys orny joq», -deıdi Moldybaev.

Esterińizge sala keteıik, Baqytbek Esentaev osydan bir jyl buryn áıeli Baıan Maqsatqyzyn soqqyǵa jyǵyp, pyshaqtaǵan bolatyn. Keıinnen prodıýser Baıan Maqsatqyzy burynǵy kúıeýiniń bul áreketin keshirdi. Alaıda zań aldynda bári birdeı degen qaǵıdatpen sot B. Esentaevty adam óltirýge oqtalý baby boıynsha kináli dep tanyp, 9 jylǵa bas bostandyǵynan aıyrdy.

Aıta ketý kerek, Almaty oblysyndaǵy LA-155/8 túzetý mekemesinde 800 dan astam adam jazasyn óteýde. Olardyń 50-ge jýyǵy óz kásipterin ashyp, nápaqalaryn tabýda.