Jazany kúsheıtý jemqorlyqpen kúreste kóp kómektese bermeıdi - sarapshy
ASTANA. QazAqparat - «Zertteu Research Institute» Qoǵamdyq qorynyń dırektory Sholpan Áıtenova qoǵamdy sybaılas jemqorlyqqa qarsy kúreske atsalysýǵa shaqyrdy, dep habarlaıdy QazAqparat tilshisi.
«Jemqorlyqtyń eń joǵarǵy yqtımaldyǵy qazirgi tańda memlekettik satyp alý salasynda. Onda josparlanǵan baǵa shynaıy nemese naryqtaǵy baǵadan 2-3 ese qymbat kórsetilýi múmkin. Osynyń keselinen taýar men qyzmettiń sapaly tasymaldaýshylary keıinge ysyrylady. Munyń bári qoǵam tarapynan da, BAQ tarapynan da jiti qadaǵalaýdy qajet etedi», - deıdi ol tilshilerge Astanada ótip jatqan «Memlekettiń ashyqtyǵy men eseptiligi - jemqorlyqqa qarsy qazirgi saıasattyń negizi» atty suhbat alańynyń aldynda.
Sybaılas jemqorlyqqa qarsy tıimdi sharalardy tilge tıek ete kele spıker jazany qataıtý paraqorlyqty tııýda asa kómektese bermeıtinin atap ótti.
«Sebebi, Sybaılas jemqorlyqqa qarsy Ulttyq bıýronyń statıstıkalyq málimetterine súıensek, 2018 jyldyń 1 toqsanynda myńǵa tarta jemqorlyq qylmysy jasalǵan. Onyń úshten biri bıýdjet qarajatyn jymqyrýmen baılanysty. Jemqorlyqqa qarsy qatań saıasat júrgizilip, jaza qataıyp jatqanymen, qylmystyń sany da, urlyq ta azaıatyn emes», - deıdi sarapshy.
Sholpan Áıtenovanyń sózine sensek, munyń bári saıyp kelgende qoǵam tarapynan, BAQ ókilderi tarapynan qoǵamdyq baqylaýdy qajet etedi.
«Bul týraly kún saıyn jazý kerek. Máselen, BAQ «ákimder nege qymbat kólikterdi satyp alady» dep jaza bastasa, kólikterdi satyp alý protsesi toqtap qalady. Mine, qoǵamdyq baqylaýdyń bir mysaly osy. Ony ary qaraı damytý kerek. Biz túrmege kóptep tyǵa bergenimizben, jemqorlyq odan azaımaıdy», - deıdi ol.
Eske sala ketsek, atalmysh suhbat alańynda QR Memlekettik qyzmet isteri jáne sybaılas jemqorlyqqa qarsy is-qımyl agentigi tóraǵasynyń orynbasary Oljas Bektenov memlektettik qyzmetterdi onlaın-rejimge kóshirýdiń arqasynda turmystyq jemqorlyqtyń deńgeıi 3/4 mólsherge (75 paıyzǵa) deıin azaıǵanyn málim etken edi.
Foto: zonakz.net
