Jazany jeńildetý úshin 2,5 mln teńge suraǵan prokýrorǵa úkim shyqty
AQTAÝ.KAZINFORM — Aqtaýda jazany jeńildetý úshin 2,5 mln teńge talap etý isi boıynsha sot aıyptalýshyǵa 2 jyl 7 aı bas bostandyǵynan aıyrý jazasyn taǵaıyndady.
Rezonans týdyrǵan oqıǵa Mańǵystaý oblystyq kólik prokýratýrasynyń qyzmetkeri men onyń tanysy basqa adamnyń qıyn jaǵdaıyn paıdalanyp, paıda tabýǵa árekettengennen bastalǵan. Іs materıaldaryna sáıkes, olar er adamnan 2,5 mln teńge talap etip, sol aqshaǵa onyń qylmystyq is boıynsha tergelip jatqan isin jeńilirek jaza, ıaǵnı bas bostandyǵyn shekteý jazasyn taǵaıyndaýǵa ýáde etken.
Іs sotqa jetken kezde memlekettik aıyptaýshy naqty merzimdi tek bir aıyptalýshyǵa — prokýratýra qyzmetkerine taǵaıyndaýdy surady. Sebebi aıyptaý tarapy dál osy adam qyzmettik dárejesin paıdalanyp, jábirlenýshiniń senimin teris paıdalanǵan dep esepteıdi. Al ekinshi kúdikti jábirlenýshimen tatýlasqandyqtan, prokýror ony Qylmystyq kodekstiń 68-baby boıynsha qylmystyq jaýaptylyqtan bosatýdy qoldady.
Sotta eki er adam da kinásin moıyndap, qatal jaza qoldanbaýdy ótindi. Sot barysynda olar aqsha talap etkeni tolyq dáleldendi. Sonymen birge sot mańyzdy jaıtqa nazar aýdardy: prokýratýra qyzmetkeri úshin jazany aýyrlatatyn mán-jaı retinde kásibı antyn buzý tanyldy. Óıtkeni ol jaı ǵana qylmysqa qatysýshy emes, zańdy qorǵaýǵa mindetti tulǵa bola tura qylmysqa barǵan.
Nátıjesinde sot oǵan 2 jyl 7 aıǵa bas bostandyǵynan aıyrý jazasyn taǵaıyndap, ómir boıy memlekettik qyzmette, kvazımemlekettik sektorda jáne Ulttyq bank júıesinde jumys isteý quqyǵynan aıyrdy.
Buǵan deıin UQK Aıdos Espolovtyń ustalǵanyn rastaǵan edi.