Jazadan jaltarǵan áıel Reseıde ustalyp, elge qaıtaryldy
ASTANA. KAZINFORM – Bas prokýratýra zańdy kúshine engen sot úkimi boıynsha taǵaıyndalǵan jazasyn óteý úshin sottalǵan azamattyń Reseı Federatsııasynan ekstradıtsııalanýyn qamtamasyz etti.
— Áıel Qaraǵandy qalasy Álıhan Bókeıhan atyndaǵy aýdan sotynyń 10.05.2024 jylǵy úkimimen adamdar tobymen aldyn ala sóz baılasyp kúsh qoldaný arqyly tonaǵany jáne bótenniń múlkin urlaǵany úshin kináli dep tanylǵan. Sot oǵan 3 jylǵa bas bostandyǵyn shekteý jazasyn taǵaıyndaǵan, — delingen Bas prokýratýra habarlamasynda.
Alaıda, probatsııa baqylaýynda bola tura, 2025 jylǵy naýryzda sottalǵan jazany óteýden óz betinshe jaltarǵan.
Osyǵan baılanysty bas bostandyǵyn shekteýdiń ótelmegen 1 jyl 4 aı 7 kún merzimi bas bostandyǵynan aıyrýǵa aýystyrylyp, oǵan izdeý jarııalanǵan.
2025 jylǵy qarashada sottalǵan tulǵa Reseı aýmaǵynda ustalǵan. Qazaqstan Respýblıkasy Bas prokýratýrasynyń suraý salýy boıynsha ol elge ekstradıtsııalandy.
Búgingi kúni jazasyn ári qaraı óteý úshin sottalǵan adam tergeý ızolıatoryna qamalǵan.
Aıta ketelik transulttyq qylmystyq topty basqarǵan kúdikti Polshadan ekstradıtsııalanǵan edi.
