Jaza basyp, jańylǵandardyń túzelýine kóńil bólemiz - qyzylordalyq polıtseıler

QYZYLORDA. QazAqparat - Qyzylorda oblystyq qylmystyq atqarý júıesi departamentinde qyzmet atqaratyn Nurbol Baımyrzaev, Aıdos Tanbaev pen Raqym Syzdyqov uzaq jyldan beri jemisti eibek etip keledi. Ómirdiń san soqpaǵynda jaza basqan azamattarmen tárbıe jumysyn júrgizip, olardyń túzelip ketýine zor úles qosyp júr, dep habarlaıdy QazAqparat tilshisi.

Nurbol Sısenuly 2006 jyldan beri qylmystyq atqarý júıesi salasynda qyzmet atqaryp keledi. Búginde tájirıbeli qyzmetkerge, kásibı mamanǵa aınalǵan.

Alǵashqy eńbek jolyn 2006 jyly QAJ departamentiniń ZK-169/5 mekemesinde baqylaýshy-maman bolyp bastady.

Qyzmet atqarǵan 17 jyl ishinde baqylaýshy, aǵa baqylaýshy, probatsııa qyzmetinde ınspektor, bólim bastyǵy laýazymyna deıin kóterilgen.

Qazir Qyzylorda qalalyq probatsııa qyzmetiniń aǵa ınspektory laýazymynda eńbek etip júr.

«Polıtseı bolý bala kúngi armanym edi. Armanym oryndalyp, pogon taqqan sátte qýanyshyp erekshe edi. Óıtkeni, ata-anam quqyq qorǵaý salasynda eńbek etti. Sondaı-aq, aǵam Serik pen apam Sáýle quqyq qorǵaý salasynda qyzmet atqaryp, zeınetke shyqty. Qaı kezde de ýaqytpen sanaspaı jumys jasaımyz. Tapsyrmany tııanaqty orynaý úshin barymyzdy salamyz. Aýyrtpalyǵy mol qyzmette kóptegen qıyndyqpen betpe-bet keldim. Biraq, qyzmettiń ońaıy bolmaıdy ǵoı. Shyn nıetińmen eńbek etseń, alynbaıtyn qamal joq»,-deıdi Nurbol Sısenuly.

Nurbol búginde jubaıymen birge 3 qyz, 1 ul ósirip otyrǵan ardaqty áke.

Al ádilet maıory Aıdos Tanbaev qylmystyq-atqarý júıesi salasynda 10 jyldan astam qyzmet etip keledi.

Sonaý mektep qabyrǵasynda júrgennen tártip saqshysy bolýǵa qyzyqty. Qazir QAJ salasynda aýqymdy isterdiń atqarylýyna óz úlesin qosyp keledi.

Orta mektepti tamamdaǵan 2006 jyly «Bolashaq» ýınversıtetiniń túsip, zańger mamandyǵyn alyp shyqty.

Eńbek jolyn 2008 jyly Qyzylorda oblysynyń mamandandyrylǵan kúzet qyzmeti basqarmasy Qarmaqshy aýdany jáne Baıqońyr qalasy polıtsııa vzvodynyń polıtseıi bolyp bastaǵan.

2013 jyly Baıqońyr qalalyq qylmystyq-atqarý ınspektsııasyna ınspektor bolyp taǵaıyndalady. Uqypty, jaýapkershiligi mol jas maman osy salanyń ystyǵyna kúıip, sýyǵyna tońyp, qyzmettik qabiletin shyńdady.

«Jaza basyp, jańylǵan azamattardy túzelý jolyna túsirý, olardyń ómirge degen kózqarasyn ózgertý - bizdiń jumysymyz osy. Olarǵa áleýmettik-quqyqtyq kómek kórsete otyryp, sot qaýlysymen júktelgen mindetterdi, olardyń jaýapkershiligi men quqyqtaryn túsindiremiz, jaza óteý tártibi men sharttaryn buzbaýǵa shaqyramyz. Probatsııa esebindegi tulǵalarmen túrli mádenı-sporttyq sharalar uıymdastyryp, qaıta qylmys jasaýynyń aldyn alý baǵytynda jumys atqaryp kelemiz»,- dedi Aıdos.

Ol búginde Baıqońyr aýdandyq probatsııa qyzmeti bóliminiń bastyǵy laýazymynda qabiletti de qarymdy qyzmetkerge aınaldy.

Qyzmette abyroı bıigine kóterilgen azamat otbasynda aıaýly jar, ardaqty áke. Joldasy Aısholpan ekeýi 2 ul, 2 qyz ósirip otyr.

Rahym Syzdyqov «Bolashaq» ýnıversıtetinde 2013 jyly zańger mamandyǵyn alyp shyqty.

Eńbek jolyn 2014 jyly Qyzylorda oblysy boıynsha QAJ departamentiniń Baıqońyr qalalyq qylmystyq-atqarý ınspektsııasynda ınspektor bolyp bastaǵan.

Búginde probatsııa qyzmetinde antyna qyzmet ete júrip, ózinen keıingi jas býynǵa kómegin kórsetip júredi.

Qaramaǵyndaǵy qyzmetkerlerden birinshi kezekte tapsyrylǵan sharýany tııanaqty tyndyrýdy, ujymmen ortaq til tabysyp, durys jumys isteýdi talap etedi.