Jaz sońynda allergııanyń kúsheıý sebebi nede
ASTANA. KAZINFORM – Jazdyń sońy keı adamdar úshin túshkirý, muryn bitelý men kózdiń jasaýraýy kúsheıetin kezeń. Óıtkeni dál osy ýaqytta keıbir aramshópterdiń tozańy aýaǵa taraı bastaıdy.
Jalpy aramshóp tozańy jazdyń sońy men kúzde maýsymdyq allergııany qozdyrýy múmkin eken. Bul týraly allergolog Áıgerim Jákıeva Jibek Joly telearnasynyń «Búgin.LIVE» baǵdarlamasynda aıtty.
Allergologtyń aıtýynsha, tozańdaný kezeńi tamyz aıynda kúsheıedi. Bul ýaqytta aramshópter óte usaq tozań bóledi. Al tozań bólshekteri jeńil bolǵandyqtan, jel arqyly birneshe shaqyrymǵa taralady eken.
- Allergen ósimdikterdiń tozańdaný kezeńderi ártúrli. Qazaqstanda eń kóp taralǵan allergenderdiń biri — jýsan. Sonymen qatar ambrozııa, alabota, qýraı, joljelken sııaqty aramshópter de allergııa qozdyrýy múmkin. Bul ósimdikterdiń tozańy tamyz aıynan bastap aýada kóbeıip, qazan aıyna deıin saqtalýy múmkin. Aýa temperatýrasy tómendep, sýyq túsip, qar jaýǵan kezde tozańdaný kezeńi aıaqtalady, - dedi Áıgerim Jákıeva.
Allergııa belgileri tumaýǵa uqsas bolǵandyqtan, olardy ajyrata bilý mańyzdy. Maman sózinshe, eki jaǵdaıdyń ózindik belgileri bar.
- Allergııa kezinde dene qyzýy kóterilmeıdi. Kózdiń qyshýy, jasaýraýy, murynnyń bitelýi, jıi túshkirý sııaqty belgiler baıqalady. Qyshyný da allergııaǵa tán belgi. Al tumaý kezinde dene qyzýynyń kóterilýi, álsizdik, bulshyqet aýyrýy sııaqty belgiler jıi kezdesedi. Allergııa belgileri jańbyrdan keıin nemese aýadaǵy tozań mólsheri azaıǵanda basylýy múmkin. Degenmen naqty dıagnoz qoıý úshin dárigerge qaralyp, qajetti tekserýlerden ótý kerek, - dedi ol.
Allergııanyń kúsheıýine aýa raıy da áser etedi. Qurǵaq ári jeldi kúnderi tozańnyń taralýy artyp, belgiler asqynýy múmkin.
- Mamandar tozań deńgeıin baqylap, onyń joǵarylaǵan kezeńderin anyqtaıdy. Qurǵaq, ystyq ári jeldi aýa tozańnyń aýaǵa kóterilýine jáne alys qashyqtyqqa taralýyna jaǵdaı jasaıdy. Sondyqtan mundaı kúnderi allergııa belgileri kúsheıýi múmkin, - dedi allergolog.
Tozańnyń aýadaǵy mólsheri táýlik ishinde de ózgerip otyrady. Sondyqtan allergııasy bar adamdarǵa serýendeý ýaqytyn durys tańdaýdyń mańyzy zor.
- Tańerteń tozań mólsheri joǵary bolýy múmkin. Ásirese ósimdikter gúldeıtin ýaqytta allergııa belgileri kúsheıedi. Kún kóterilip, aýa qurǵaǵan kezde ósimdikter tozań bóledi. Jel tozańdy jan-jaqqa taratady. Al keshke temperatýra tómendep, jel basylǵanda tozań mólsheri azaıady. Jaýyn-shashyn da aýadaǵy tozańdy tómendetip, allergııa belgileriniń ýaqytsha basylýyna yqpal etedi, - Áıgerim Jákıeva.
Allergııa maýsymy kezinde dári-dármek qoldanýǵa bolady. Biraq preparatty mindetti túrde allergolog dárigerdiń keńesimen qabyldaý qajet. Dáriniń túrin, dozasyn jáne qabyldaý uzaqtyǵyn dáriger anyqtaıdy. Sondyqtan óz betinshe dári tańdamaǵan durys.
- Allergııany baqylaýǵa jáne onyń belgilerin aıtarlyqtaı azaıtýǵa múmkindik beretin emdeý ádisteri bar. Sonyń biri — allergen-spetsıfıkalyq ımmýnoterapııa, ıaǵnı ASIT. Bul ádistiń negizgi maqsaty — aǵzanyń naqty allergenge sezimtaldyǵyn tómendetý. Ol úshin naýqasta qandaı allergenge reaktsııa bar ekeni anyqtalady. Keıin tozańdaný kezeńinen tys ýaqytta sol allergenniń arnaıy tazartylǵan, az mólsheri aǵzaǵa engiziledi. Emdeý birtindep júrgizilip, ımmýndyq júıeniń allergenge tózimdiligin qalyptastyrýǵa baǵyttalady, - dedi ol.
ASIT — allergııalyq rınıtti emdeýde álemde qoldanylatyn ádisterdiń biri. Biraq ony tek allergologtyń baqylaýymen júrgizý qajet.
Aıta keteıik, elde allergııaǵa qarsy ınnovatsııalyq dári synaqtan ótip jatyr.
