Jaz shyqqaly beri Alakól jaǵasynda 120-dan astam bala joǵalǵan

ÓSKEMEN. KAZINFORM – Abaı oblysy Maqanshy aýdanyndaǵy Alakól jaǵasynda balalar jıi joǵalyp ketip jatyr.

Jaz shyǵa salysymen halyq jappaı Alakól jaǵasyna aǵylady. Jalǵyz emes, bala-shaǵasymen baratyndar da kóp. Olardyń arasynda qujynaǵan nópir arasynan balasynan kóz jazyp qalatyndar joq emes. 

Abaı oblysy Polıtsııa departamentiniń málimetine súıensek, bıyl balasyn taba almaı tártip saqshylaryna habarlasatyndar jıilegen.

— Alakól jaǵalaýynda týrıstik polıtsııa qyzmetkerleri sýǵa túsý maýsymy bastalǵaly beri balalardyń joǵalýyna baılanysty jıi habar tústi. Ásirese Arbat aýmaǵyndaǵy adam kóp jınalatyn oryndarda ata-analar balalaryn joǵaltyp alady. Maýsym-shilde aılary aralyǵynda osyndaı 120-dan astam jaǵdaı tirkelgen. Abyroı bolǵanda, barlyq bala der kezinde tabylyp, ata-analaryna aman-esen jetkizildi, — delingen aqparatta. 

Eske salsaq, osyǵan deıin Alakóldegi zańsyz qoqys polıgony týrısterdi shoshytqany habarlanǵan.