Jaz mezgili Quryltaı saılaýyndaǵy daýys berý belsendiligine oń áser etti – sarapshy
ASTANA. KAZINFORM – Quryltaı saılaýynyń jaz mezgilinde ótýi qazaqstandyqtardyń daýys berý belsendiligin tómendetken joq. Bul týraly Jastar X dıalog alańynda Qazaqstandyq qoǵamdyq damý ınstıtýtynyń Instıtýtsıonaldyq taldaý jáne reformalar ortalyǵynyń sarapshy-konsýltanty Kamıla Amýrtaeva aıtty.
Sarapshynyń aıtýynsha, Qazaqstanda parlament saılaýy alǵash ret jaz mezgilinde ótkendikten, naýqan bastalǵanǵa deıin saılaýshylardyń daýys berý belsendiligine qatysty alańdaýshylyq bolǵan.
– «Saılaý ýchaskelerinde tıisti deńgeıde daýys berý belsendiligin qamtamasyz etý múmkin bola ma?» degen suraqtar pen alańdaýshylyqtar kóp boldy. Alaıda jaz mezgili men demalys, kerisinshe, oń áser etti. Daýys berý belsendiligi de jaqsy boldy, pikirler de oń. Jalpy, jaz mezgili saılaýǵa qolaıly boldy, – dedi Kamıla Amýrtaeva.
Ol Qazaqstandyq qoǵamdyq damý ınstıtýty júrgizgen saýalnama nátıjelerine de toqtaldy. Zertteý ártúrli jastaǵy azamattardyń saılaýǵa qatysýǵa daıyndyǵynda aıtarlyqtaı aıyrmashylyq bolmaǵanyn kórsetti.
Telefon saýalnamasy 21 shilde men 4 tamyz aralyǵynda Qazaqstannyń 17 oblysy men úsh qalasynda júrgizildi. Oǵan 1 200 respondent qatysty.
Saýalnama nátıjesine sáıkes, 46–60 jastaǵy jáne 61 jastan asqan azamattardyń saılaýǵa qatysýǵa daıyndyǵy 18–28 jas aralyǵyndaǵy jastardyń kórsetkishimen shamalas bolǵan.
– Bul da jastardyń elimizde bolyp jatqan úderisterge belsendi aralasyp júrgenin kórsetedi, – dedi sarapshy.
Kamıla Amýrtaeva bıylǵy saılaý naýqanynyń tsıfrlyq sıpatyna da nazar aýdardy. Onyń aıtýynsha, saılaýshylarmen baılanys birneshe arna arqyly júrgizildi.
Partııalar men kandıdattar áleýmettik jelilerdi, televızııany, QR-kodtar qoldanylǵan teledebattardy, sondaı-aq áleýmettik jelilerdegi táýelsiz akkaýnttardy paıdalandy.
Eske salaıyq, Quryltaı saılaýy 23 tamyzda ótti.
Ortalyq saılaý komıssııasynyń dereginshe, daýys berýge 9 351 539 adam qatysty. Bul saılaýshylardyń jalpy sanynyń 74,08%-y.
Saılaý qorytyndysy boıynsha Quryltaıǵa bes saıası partııa ótti.
