Jaz mezgiliniń sońynda elordadan «Uly Jibek joly 1000 jyldan soń» atty uranmen kólik kerýeni saparǵa shyǵady
ASTANA. Maýsymnyń 23-i. QazAqparat /Aıdar Ospanalıev/ - Jaz mezgiliniń sońyna taman «Uly Jibek joly 1000 jyldan soń» atty uranmen «Has Sanat» mádenıetti damytý ulttyq qorynyń ekspedıtsııalyq jobasy bastalady.
Joba aıasynda 46 adamnan turatyn saıahatshylar komandasy Uly Jibek jolynyń boıymen 14 myń shaqyrym aımaqty júrip ótpek.
Aýyr júk kólikteri men jolsyz aımaqtarǵa arnalǵan jáne ózge de tehnıkadan qurylǵan jalpy sany 11 kólik kólik kerýeniniń uzyndyǵy 170 metrdi quraıdy. Saıahatshylar el ordasy Astanadan shyǵyp, Rım qalasyna baryp toqtaıdy dep kútilýde.
Uıymdastyrýshylardyń habarlaýynsha, avtokerýen álemniń16 elin basyp ótedi. Osy ekspedıtsııa jumystarynyń aıasynda uıymdastyrýshylar komıteti Eýropa qalalarynyń astanalaryndaǵy ortalyq kóshelerdiń boıynda kóliktermen qatar ejelgi kólik túrleriniń biri, ıaǵnı túıelerden turatyn kerýenniń teatrlandyrylǵan kórinisin kórsetedi. Munyń barlyǵy arnaıy beınekameraǵa túsirilip, elge kelgen soń odan derekti fılm daıyndalady. Fılm 52 serııadan turatyn bolady jáne ol Qazaqstan turǵyndaryna «Habar» telearnasy arqyly kórsetiledi. «Búginde álemde Qazaqstandy bilmeıtin memleketter de bar. Sondyqtan bul elimizdiń álem aldyndaǵy bet-beınesin tanytatyn ımıdjdik joba dese bolady. Saıahatshylar jol ústinde 2,5 aı júredi jáne bul sapar olar úshin óte qyzyqty bolady degen oıdamyz», dedi «Has Sanat» mádenıetti damytý ulttyq qorynyń prezıdenti Janna Eńsebaeva.
Joba Prezıdent Ákimshiligi men Syrtqy ister, Bilim jáne ǵylym, Mádenıet, Týrızm jáne sport mınıstrlikteri men TMD-daǵy memleketaralyq gýmanıtarlyq yntymaqtastyq qorynyń qoldaýymen qolǵa alynyp otyr.
