Jaz boıy 5 myńnan astam jasóspirim resmı jumysqa ornalasty
ASTANA. KAZINFORM — 2025 jyldyń mamyr aıynda Enbek.kz elektrondy eńbek bırjasy platformasynda kámeletke tolmaǵandardy jumysqa ornalastyrýǵa arnalǵan «Meniń jazǵy kanıkýlym» atty arnaıy bólim quryldy. Demalys kezeńinde 14 pen 18 jas aralyǵyndaǵy barlyǵy 5,4 myń qazaqstandyq jumysqa ornalasty.
Eńbek jáne halyqty áleýmettik qorǵaý mınıstrligi málimetinshe, jalpy, jaz aılarynda 16-18 jas aralyǵyndaǵy jastar 13,6 myń túıindeme, 14-15 jas aralyǵyndaǵy jasóspirimderdiń ata-analary 356 jeke kabınet ashyp, onyń ishinde 112 adam 129 túıindeme jarııalady.
Sonymen qatar QR Eńbek kodeksine sáıkes, 14 jastan bastap resmı túrde jumys isteýge tek densaýlyqqa zııan keltirmeıtin jáne oqýǵa kedergi jasamaıtyn, sabaqtan tys ýaqytta oryndalatyn jumystarǵa ǵana ruqsat etiledi.
Osy talaptarǵa saı keletin shamamen 80 mamandyq belgilengen, olardyń qataryna tárbıeshiniń kómekshisi, dúken satýshysy, tazalaýshy-jýýshy, SMM-menedjer, kýrer jáne basqa da qyzmetter jatady. 1 qyrkúıektegi jaǵdaı boıynsha «Meniń jazǵy kanıkýlym» bóliminde 305 jumys berýshiden osyndaı 2,1 myń bos jumys orny jarııalanǵan.
Aıta ketý kerek, bul bos jumys oryndaryn tikeleı jumys berýshilerdiń ózderi usynady. Sondyqtan keıbir óńirlerde mundaı usynystar bolmaýy múmkin. Bul fýnktsıonal kámeletke tolmaǵandardy kanıkýl kezeńinde jumysqa ornalastyrý úshin aldaǵy ýaqytta da qoljetimdi bolady. Ol úshin jumys berýshi bos jumys ornyn jarııalaǵan kezde tıisti belgini qoıýy qajet.
Aıta keteıik, Qazaqstanda 2025 jyl Jumysshy mamandyqtar jyly bolyp jarııalandy. Eńbek adamyn dáripteý, qoǵamdaǵy mártebesin kóterý úshin qolǵa alynǵan bastama kezeńiniń bel ortasynan óttik. Bul qadamǵa barýǵa elimizdiń eńbek naryǵynda jumysshy kadrlardyń jetispeýi sebep boldy. Ulttyq statıstıka bıýrosynyń dereginshe, jyl saıyn 250 myń jas eńbek naryǵyna qosylady.