Jaz bastalǵaly Qazaqstanda 400-ge jýyq orman órti boldy
NUR-SULTAN. QazAqparat – Qazaqstanda órt qaýpi kezeńi bastalǵaly 394 orman órti jáne 22 dala órti tirkeldi. Bul týraly Tótenshe jaǵdaı mınıstrligi Órtke qarsy qyzmet komıtetiniń tóraǵasy Nurbolat Derbisov aıtty, dep habarlaıdy QazAqparat tilshisi.
«Qabyldanyp jatqan sharalarǵa qaramastan, órt qaýpi kezeńi bastalǵaly 394 orman órti jáne 22 dala órti tirkeldi. Órttiń jalpy aýdany 34 myń 785 gektarǵa jetti. Ásirese eldi mekenderdegi qurǵaq shóp órtteri erekshe alańdaýshylyq týǵyzady, onyń jalyny turǵyn úı alaptaryna jetýi múmkin», - dedi N. Derbisov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, 20 maýsym kúni Qaraǵandy oblysynda naızaǵaıdan dala órti tutanǵan. Oǵan ekpindi jel qosylyp, 45 gektardan astam jer órtengen jáne ony sóndirý kezinde bir adam jaralanyp, bir adam qaza tapty.
«14 shilde kúni Atyraý oblysynda dala órti saldarynan júzdegen qoı qyryldy, qazirgi ýaqytta naqty shyǵyn men ólgen maldyń sany anyqtalýda. Orman jáne dala órtiniń kópshiligi 100 shaqyrym radıýsta TJM bólimsheleri joq shalǵaı aýmaqtarda tutanady», - dedi Nurbolat Derbisov.
Buǵan deıin TJM ókili Qazaqstanda tabıǵı órttiń 50% astamy adamı faktordan bolatynyn aıtqan edi.
