Jaıylymdardy paıdalanýǵa basty kedergi olardy sýlandyrý máselesi bolyp otyr - Q. Otarov
ASTANA. 5 qarasha. QazAqparat - Jaıylymdardy paıdalanýǵa jáne ony aınalymǵa engizýge birden-bir kedergi - olardy sýlandyrý máselesi.
Búgin Parlament Májilisinde ótken Úkimet saǵatynda Jer resýrstaryn basqarý agenttiginiń tóraǵasy Qadyrhan Otarov osylaı málim etti.
«Eger de jaıylymdyq alqaptar aınalymǵa engizilse jalpy aınalymǵa engizilgen jer ýchaskeleri sany odanda kóbirek bolar edi. Biraq jaıylymdardy paıdalanýdyń jáne ony aınalymǵa engizýdiń birden-bir kedergisi olardy sýlandyrý máselesi bolyp otyr», - deıdi agenttik tóraǵasy. Onyń aıtýynsha, túgendeý jumystarynyń qorytyndysy negizinde, kólemi 14 mln. gektar jaıylymdarda 14 myń sýlandyrý qurylystarynyń kózderi anyqtalǵan. Onyń tek qana 15 paıyzy - jaramdy jaǵdaıda, al qalǵandary - qaıta qurýdy, kúrdeli jóndeýdi nemese esepten shyǵaryp tastaýdy qajet etetin bolyp otyr.
«Árıne, tabıǵı sý kózderi barlyq jaıylymdyq jerlerdiń 40 paıyzdan astam bóligin ǵana qamtamasyz ete alady. Alaıda keleshekti oılasaq, onda tek tabıǵı sý kózderin esepke alýǵa bolmaıdy, sebebi aýyl sharýashylyǵy maldarynyń fızıologııalyq qajettiligi adamǵa tán aýyz sýdyń sapasyna sáıkes kelýi qajet. Tabıǵı sý kózderimen sýarýdy uıymdastyrý - ol mal sharýashylyǵyn júrgizýdiń ekstensıvti ádisi bolyp tabylady jáne de ekologııalyq, zooveterınarlyq talaptarǵa saı kelmeıdi», - deıdi Q. Otarov.
Budan bólek, agenttik basshysy atalǵan problema aıasynda jer astyndaǵy sýlardy joǵarylatý jáne olardy paıdalaný úshin ınjenerlik qurylystar qurý qajet ekenin atap ótti. Onyń aıtýynsha, atalǵan problemalar boıynsha, qazirgi kezde «Jaıylymdar týraly» jańa zańnyń jobasy ázirlenip jatyr.
