Jaıylym jerlerge qatysty máselemen jan-jaqty aınalysý kerek – Erlan Qoshanov
«Depýttar óńirlerdi aralap júr. Sol kezde el aýmaǵyndaǵy turǵyndardyń kóterip júregen máselesi jaıylym jerlerine qatysty bolyp otyr. Memleketke qaıtarylǵan 5 mln gektar jerdi ınteraktıvti kartadan naqty kórinedi dep oılaımyn. Aýyldardyń mańyndaǵy mal jaıatyn jaıylym jerler máselesi mańyzdy bolyp tur. Aýyl sharýashylyǵy mınıstrligi, Bas prokýratýra men tıisti memlekettik organdar, depýtattar, saıası partııalar birlese atalǵan máselege nazar aýdarýy kerek. Tek sóz júzinde emes, naqty jumystar atqarylýy qajet. Jaz boıy depýtattar óńirlerdi aralap, osy taqyrypqa qatysty talqylaýlar júrgizdi. Degenmen, bul jumystardyń bári jetkiliksiz bolyp tur», - dedi E. Qoshanov Májilistiń jalpy otyrysynda
Osy oraıda ol 2023 jyly bul máselemen mınıstrlikpen, prokýratýramen, sarapshylarmen birge jan-jaqty aınalysý kerek ekenin aıtty.
«Áli de aýyldardyń kóbisi osy problemadan qııanat kórip otyr. Bul jyldar boıy qordalanǵan másele bolǵandyqtan, bir jylda sheshilip ketedi dep aıtýǵa kelmeıdi. Atap aıtqanda, maldyń sanyn kóbeıtý úshin jaǵdaı jasaýymyz kerek. Sondyqtan aýyldarda tıisti jaıylymdardy berý mańyzdy. Bul baǵytta mınıstrlik jasap jatqan jumystar jetkiliksiz degen pikirge qosylamyn. Biraq vedomstvo atqarǵan jumystaryn da kórsete bilýi tıis. Qaıtarylǵan ár gektar jerdi el halqy ashyq kórýi kerek», - dedi Májilis tóraǵasy.
Aıta keteıik, bıyl memleket menshigine qaıtarylǵan 5 mln gektar jer týraly málimetterdi aldaǵy ýaqytta ınterakatıvti kartadan kórýge bolady.
Budan buryn habarlanǵandaı, Búgin Parlament Májilisiniń jalpy otyrysynda «QR Ákimshilik quqyq buzýshylyq týraly kodeksine jerlerdiń paıdalanylýy men qorǵalýyn memlekettik baqylaý máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy.
