Jaıylmanyń qarbyzy Astanaǵa jol tartty - Qyzylorda
QYZYLORDA. QazAqparat - Birer kúnde Qyzylorda oblysynyń Jańaqorǵan aýdanyndaǵy Jaıylma aýylynyń qarbyzy Astanaǵa jetedi, dep habarlady QazAqparat.
Jaqynda Qyzylorda qalasynda ótken brıfıngte Jańaqorǵan aýdanynyń ákimi Ǵalym Ámireev «25 maýsymda «Jaıylma» aýylynyń qarbyzy pisip, elimizdiń birneshe aımaqtaryna jol tartady», - dep málim etken bolatyn. Ákimniń sol sózi rasqa aınalyp, Jaıylma eldi mekeninde qarbyz pisip, jer emgen aǵaıyn úshin qaýyrt sharýa bastaldy. Keshe osyǵan oraı aýdan ákimi Ǵalym Ámireev arnaıy soǵyp, dıqandar qaýymynyń qýanyshymen bólisti. Aýdan ortalyǵynan ashylatyn «Meıirim» kommýnaldyq bazaryna ónim jetkizý jóninde sharýalarmen keńes qurdy.
Aýdan ákimshiliginiń bastamasymen 25 maýsymda ashylatyn «Meıirim» bazary aýyl turǵyndarynyń aýlasynda ósken kókónisi men jemis-jıdegin satýǵa arnalyp otyr. Jáne saýda qatarlary tegin beriledi. Basty talap - mundaǵy ónim baǵasynyń bazar qunynan tómen bolýy qajet. Osy maqsatta jergilikti bılik Qostanaıdan «Tsesna» unyn tikeleı aldyryp otyr. Bazardaǵy baǵasy 5 myń teńgeden asatyn bul un «Meıirimde» 4500 teńgege saýdalanady. Eń bastysy osy bazarda Jaıylmanyń qarbyzy da arzan baǵada satylatyn bolady.
Aýdan ákimdiginiń jergilikti brendke aınalyp úlgirgen ónimdi nasıhattaý barysyndaǵy bastamasyna oraı «Jaıylmanyń» qarbyzy Astana, Aqtóbe, Qostanaı qalalarynda da satylatyn boldy.
