«Jaıyqjylýqýat» AQ-nyń jylý qubyrlary 50,7 paıyzǵa tozǵan
BQO energetıka jáne turǵyn úı-kommýnaldyq sharýashylyq basqarmasynyń basshysy Mırjan Nurtazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, jylý qubyrlarynyń jalpy uzyndyǵy – 248 shaqyrym.
Kásiporyn óz qarjysy esebinen jyl saıyn jylý qubyrlaryn kútip ustaý, kúrdeli jóndeý jumystaryn júrgizedi. Sonymen qatar «Nurly jer» memlekettik baǵdarlamasy aıasynda qarjy bólinip keledi.
Basqarma basshysynyń sózine qaraǵanda, «Jaıyqjylýqýat» AQ-nyń negizgi qurylymdarynyń tozý kórsetkishi 87 paıyzdy quraıdy. Sonyń ishinde 1960 jyly salynǵan jylý-qýat ortalyǵynyń ǵımarattaryn aıtýǵa bolady.
«Qazirgi ýaqytta úsh qazandyq jumys jasap tur. Taǵy úsheýi rezervte daıyn. Memleket basshysynyń tapsyrmasyna sáıkes jylý-qýat ortalyǵyn qaıta jańǵyrtý baǵytynda Jol kartasyn júzege asyrý josparlanýda», dedi M.Nurtazıev.
Onyń aıtýynsha, sońǵy jyldary jylý jelilerinde apatty jaǵdaılar tirkelgen joq.
Sonymen qatar qazandyqtarda apatty jaǵdaı oryn alǵan jaǵdaıda taýarly gazdyń bolmaýyna baılanysty balama retinde jylý-qýat ortalyǵy qoımasynda 2548 tonna mazýt bar. Bul 75 paıyzǵa qamtamasyz etilgen. Qalǵan 25 paıyzynyń kestege sáıkes jylytý maýsymy kezeńinde orny tolady. Qarashada 173,6 tonna kelse, jeltoqsan aıynyń sońyna deıin 200 tonna mazýt jetkiziledi.
Kúni búgin «Jaıyqjylýqýat» AQ «QazTransGazAımaq» AQ-ǵa 280,3 mln teńge qaryzdar bolyp otyr. Bereshek eki mekeme arasyndaǵy memorandýmǵa sáıkes ótelýde.
Eske sala keteıik, budan buryn BQO-da suıytylǵan gazdyń jetispeýshiligi baıqalyp otyrǵanyn jazǵan bolatynbyz.