«Jaıyqjylýqýat» AQ 1,4 mlrd teńgeniń ınvestıtsııalyq baǵdarlamasyn júzege asyrýda
«Jaıyqjylýqýat» AQ satý-ótkizý bóliminiń bastyǵy Bekbolat Qameshovtyń sózine qaraǵanda, sonyń ishinde bıylǵa 612,6 mln teńge qarastyrylǵan. Munyń oryndalý kórsetkishi 681,3 mln teńgeni qurap, oılaǵannan asyp tústi. Osynyń 380 mln teńgesi kásiporynnyń óz qarjysy bolsa, 301,3 mln teńge «Nurly jol» arqyly zaıymdyq qarjy esebinde alyndy. Bul kópten jóndelmegen jylý júıesin aýystyrýǵa múmkindik berdi. Mysaly, Temir Masın kóshesi boıyndaǵy №7 jylý magıstraliniń qolǵa alynbaǵanyna 26 jyl bolǵan eken. Bıyl «Nurly jol» baǵdarlamasyna sáıkes 121,82 mln teńgege 484 metr turba qubyry aýystyryldy. Sondaı-aq 4-shaǵynaýdanda №8 jylý magıstrali 179,6 mln teńgege qaıtadan jóndeýden ótkizildi.
Oǵan qosa bıyl sý qyzdyrǵyshtardy aýystyrý baǵytynda kóp jumys atqaryldy. 2003 jyldan beri kásiporyn qubyrlyq sý qyzdyrǵyshtaryn plastınalyqqa túgeldeı aýystyrdy. 2016 jyly atalmysh ınvestıtsııalyq baǵdarlama boıynsha 10,2 mln teńgege osyndaı 8 jańa qurylǵy satyp alynyp, úılerge qondyryldy. Munyń paıdalaný merzimi 10 jyl.
Taǵy bir atap ótetin jaıt, jylý eseptegish ornatylǵan úılerde turatyn turǵyndar bıylǵy 1 qarashadan bastap sol boıynsha tóleıtin bolady. Bul maqsatqa 122,2 mln teńge bólinip, 239 jylý eseptegish satyp alynyp, úılerge ornatyldy. Kúni búgin Oralda osyndaı eseptegish ornatylǵan 671 kóp qabatty úı bolsa, sonyń 556-syna kásiporyn qarjysy jumsaldy. Aldaǵy jyly taǵy 260 eseptegish ornatý kózdelýde, sonda bul jóninen qala túgeldeı qamtylatyn bolady.
«Eseptegish arqyly jylýdy retteı bilse, ony 40-50 paıyzǵa deıin únemdeýge bolady. Kásiporynnyń ınvestıtsııalyq baǵdarlamasy aıasynda qaıta qurý men jańǵyrtý jumystary 2017 jyly da jalǵasady», dedi B.Qameshov.
