Jaıyqtyń sýy eki ese azaıyp ketti - BQO ákimi

NUR-SULTAN. QazAqparat - Sońǵy jyldary Jaıyqtyń sýy eki ese azaıyp qalǵan. Sý máselesin sheshý úshin memleketaralyq baǵdarlama jasaý kerek. Bul týraly Ortalyq kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.

«Jaıyqtaǵy sý deńgeıiniń túsip ketýi - ózekti másele. Sońǵy jyldary sý deńgeıi eki ese azaıyp ketti. Bul máselege qatysty ózimiz sheshim qabyldaı almaımyz»,- dedi Ǵalı Esqalıev.

Ol Senat tóraıymy Darıǵa Nazarbaeva men QR Prezıdenti Qasym-Jomart Toqaev jaqynda RF Prezıdentimen kezdeskende osy máseleni kótergenin aıtty.

«RF Prezıdenti bul máseleni jedel sheshý kerek ekenin aıtyp, qoldaǵan. Qarasha aıynyń sońynda taǵy komıssııa otyrysy bolady, sol jerde bir sheshimge kelemiz. Bul máseleni sheshý úshin eki el arasynda memleketaralyq baǵdarlama jasaý kerek», - deıdi ol.

Eske sala ketsek, buǵan deıin oblys ákimi qoqys polıgonyn jabatynyn aıtqan bolatyn. Sondaı-aq, ol WhatsApp arqyly aımaq halqynan kúnine 250-300 suraq keletinin aıtty.