Jaıyqtan taǵy 5,8 tonna óli balyq jınaldy

ASTANA. QazAqparat - Jaıyq ózeninen taǵy 5,8 tonna óli balyq jınaldy. Bul jaıynda QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.

«16-17 naýryz aralyǵynda Jaıyq ózeninen 5,8 tonna óli balyq jınaldy. Jaıyq ózeninen jınalǵan balyq sany 19,2 tonnaǵa jetti. Osy ýaqytqa deıin Jaıyqta ólgen balyq kólemi 123,2 tonnany qurady. Búgingi kúni balyq jınaý jumystary jalǵasyp jatyr. Ólekseler «Spetsavtobaza» JShS-ǵa tapsyrylyp, joıylýda», - dep jazdy ol.

Aıta keteıik, qazirgi ýaqytta Jaıyq ózeninde balyqtardyń jappaı qyrylýyn tekseretin arnaıy komıssııa quryldy. QR ІІM de arnaıy tekserý jumystaryn qolǵa aldy.

«Jaıyqtaǵy balyqtardyń jappaı qyrylý faktisi boıynsha Atyraý oblysy polıtsııa departamenti 2 qylmystyq isti tirkedi. 29 qańtarda qylmystyq ister QR ІІM tergeý departamentine berildi», - dep habarlaǵan edi Atyraý oblystyq polıtsııa departamentinen.