Jaıyqtaǵy balyqtyń qyrylýy: «Atyraý sý arnasyna» qatysty tekserý nátıjesi jarııalandy

Óńirlik kommýnıkatsııalar qyzmetinde Atyraý oblysy boıynsha Ekologııa departamenti ókilderiniń, sondaı-aq Vedomstvoaralyq komıssııa músheleriniń qatysýymen brıfıng ótti.

Brıfıng barysynda kásiporynnyń Jaıyq ózenine tastaıtyn sýdaǵy zııandy zattar kórsetkishteriniń artýyna qatysty nátıjesi «Atyraý sý arnasy» KMK-ny tekserý nátıjesi resmı túrde jarııalandy.
Tekserý barysynda 14 jeltoqsanda departament №1 Atyraý qalasyndaǵy sý qubyry tazartý ımarattary (SQT) ónerkásiptik alańy arqyly Jaıyq ózenine jiberiletin sýdan synamalar alyndy.
«Synama nátıjeleri hlorıdtiń shamadan tys asyp ketýin kórsetti. Atap aıtqanda, hlorıdterdiń naqty kórsetkishi 505,596 mg/dm3 qurady. Ruqsat etiletin kórsetkish 108 mg/dm3 bolǵanda tógindide 396,6 mg/dm3 artyq bolǵany. Osylaısha, «Atyraý sý arnasy» KMK tarapynan QR Ekologııalyq kodeksiniń tabıǵat paıdalanýshynyń aǵyndy sýlarda lastaýshy zattardyń shoǵyrlanýyn belgilengen normatıvterden asyrmaýy týraly aıtylǵan 225-baby 4-tarmaǵynyń talaptary buzyldy. Sondaı-aq, kásiporyn aǵyndy sýlardy esepke alý jýrnalyn júrgizbegen», - delingen oblystyq ekologııa departamenti taratqan habarlamada.

Departamenttiń tekserisi nátıjesi boıynsha «Atyraý sý arnasy» KMK ústinen Qazaqstan Respýblıkasynyń Ákimshilik quqyq buzýshylyq týraly kodeksiniń 328-baby boıynsha belgilengen normatıvterdi saqtamaǵany jóninde ákimshilik is qozǵady.
Atyraý oblystyq Orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Arman Moldashevtiń aıtýynsha vedomstvoaralyq komıssııa músheleriniń birlesken jumysy barysynda Jaıyq ózeninen 4 tonna 165 kg ólgen balyq jınaldy. Bıologııalyq ortaǵa jalpy somasy 4,2 mıllıon teńge shyǵyn keltirilgen.
«Sonymen qatar, biz Jaıyq ózeniniń túbine súńgýshini túsirdik, ol 30 metr radıýstaǵy aýmaqty zerttedi. Ol balyq qystaıtyn eki tereńdikte júrgizildi. Ózen túbinde óli balyq ushasy tabylǵan joq. 19 jeltoqsanda Geolog kentinde qyrylǵan balyqqa keler bolsaq, bul taıaz sýda otteginiń jetispeýinen bolǵan. Bul tabıǵı jaǵdaı. Geologta barlyǵy 230 keli óli balyq jınaldy», - dedi Arman Moldashev.
Aıta keteıik, 6-25 jeltoqsan aralyǵyndaǵy kezeńde «Ulttyq saraptama ortalyǵy» ShJQ RMK Atyraý oblystyq fılıaly barlyǵy 84 synamany zerttedi, onyń ishinde Jaıyq ózeniniń sýynan - 69 synama, SQT sý aǵyzý qudyǵynan - 8 synama jáne Atyraý qalasyndaǵy SQT sý qubyrynyń sýynan - 7 synama alyndy.
«Zerthanalyq zertteý nátıjeleri boıynsha barlyq alynǵan synamalar bakterıologııalyq jáne hımııalyq kórsetkishter boıynsha SanEjN talaptaryna sáıkes keledi, turǵyndardyń densaýlyǵyna qaýip tóndirmeıdi. Sonymen qatar, 8 jeltoqsanda «Ulttyq saraptama ortalyǵy» AF-na Jaıyq ózeninen tiri balyqtyń 7 synamasy alynyp, zerthanalyq zertteýge jiberildi», - dep qorytyndy jasady ekologııa departamentiniń ókilderi.
Aıta keterligi, qazirgi ýaqytta Ekologııa departamenti men quqyq qorǵaý organdary Jaıyq ózenine sý aǵyzýdy júzege asyratyn taǵy úsh kásiporyndy tekserip jatyr. Osylaısha Jaıyq ózeninde balyqtyń jappaı qyrylýynyń sebebi jáne oǵan kináliler qylmystyq isti tergeý aıaqtalǵannan soń naqtylanatyn bolady.