Jaıyqtaǵy ahýal: Sý áserinen atyraýlyqtardyń densaýlyǵyna tónetin qaýip bar ma
ASTANA. QazAqparat - Byltyr balyqtyń qyrylý jaǵdaıy tirkelgen Jaıyq ózenindegi sýdyń sapasy halyqtyń densaýlyǵyna qalaı áser etýi múmkin? Bul suraqqa Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın jaýap berdi, dep habarlaıdy QazAqparat tilshisi.
«Osy jaǵdaı bastalǵannan keıin bizdiń Atyraý oblysy boıynsha qoǵamdyq densaýlyq saqtaý departamenti byltyrǵy jyldyń jeltoqsan aıynan bastap kúndelikti laboratorııalyq baqylaý jumystaryn júrgizip jatyr. Onyń ishinde ashyq sý qoımalarynan, eń aldymen Jaıyq ózeninen qazirgi tańǵa deıin 294 synama zertteldi. Qalaǵa berilip jatqan aýyz sýdyń 170 synamasy zerdelendi. Osy Jaıyq ózeninde adamdardyń aǵzasyna áser tıgizetin eshqandaı zattar anyqtalǵan joq. Búgingi kúni birde-bir synama kórsetkishteriniń asyp bara jatqany anyqtalǵan joq», - deıdi Jandarbek Bekshın Atyraý oblysymen tikeleı beınebaılanys arqyly OKQ-da ótken telekópirde.
Onyń aıtýynsha, densaýlyq saqtaý salasynyń mamandary bul máseleni baqylaýynda ustap otyr.
«Sonymen birge, kúndelikti Atyraý qalasynyń turǵyndarynyń aýrý-syrqattaryn baqylaýdamyz. Mysaly, ishek aýrýlarynyń sany boıynsha 120 jaǵdaı tirkelse, bıyl 44 jaǵdaı anyqtalyp otyr. ıAǵnı, aýrýlardyń sany byltyrmen salystyrǵanda 2,5 esege tómen. Oblystyq densaýlyq saqtaý basqarmasy men qalalyq jedel-medıtsınalyq kómek kórsetetin stantsııanyń derekteri boıynsha qalada birde-bir jaǵdaıdy balyqty paıdalanýmen baılanystyrýǵa bolmaıdy», - deıdi ol.
Esterińizge sala keteıik, buǵan deıin Atyraý oblysynda balyqtyń qyrylǵany týraly birneshe aqparat jarııalaǵan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi.
Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan.
Aıta keteıik, Atyraýda Jaıyq ózenin balyq ólekselerinen tazartý sharalary qolǵa alyndy.
